[dropcap]Ф[/dropcap]евральданул 7-нний Белоруснал хъуншагьрулий хьун аьркинссия дунияллул халкьуннал дянивсса XXV-сса луттирдал хъуннасса ярмукIа. Ва дувансса гьантрайн агьамшиву хъуннасса Белоруснал Аграрный форумгу тIайла бацIлай тIий, сакиншинначитуран багьну бия ярмукIа февральданул ахирданийн дутан.
Залму АьбдурахIманова
Дагъусттанная муний гьуртту хьун тиха оьвкуну буссия «Кавказский экспресс» литературалул ва художествалул альманахрал ва «Горцы» кказитрал редактор, публицист ва художник Марат ХIажиевлуйн, чичу, публицист Саид Ниналаловлуйн ва журналист Жамилат Ибрагьимовайн.
Вай гьантрай жу хьунабавкьуру Марат ХIажиевлущал.
— Марат, цукунсса хьур зул Белоруснавунсса аьрххи? Цукун кьамул буври белоруснал халкьуннал зу лавсун лавгун бивкIсса «ссайгъатру»?
— Февральданул байбихьулийва хьун най диркIсса Минскаллал ярмукIалийн бачин хIадурсса жуйн баян бувна му зурул ахирданийн дуртшиву. ЧIун чансса лирчIсса жуща бюхълай бакъая, самолетрал билетру махъунмай зана буллай, мюрш-кьюршсса иширттаха зун. Жул хIалкьазия бувчIусса Белоруснал Информациялул ва печатьрал министерствалул баян бувна, ярмукIалувух гьуртту къахьурчагу, ттул персоналсса выставка ва жул цIусса луттирдал презентациярттал сакиншинна цайнна ласласишиву.
Мяйжаннугу, хъинну ххуйну хIадургу хьуну бия жу хьунабакьин. Жу жущала архIал лавсун лавгссияв, «Кавказский экспресс» альманахрал луттирду бакъассагу, «Дагъусттан» ва «МавраевЪ» басмаханардай бивщусса луттирду ва ппиринжрая бувсса чагъарданий дирхьусса ттул графикалул суратру.
Каспийскалийсса Цалчинмур Галереялий «Зунзулчани» тIисса цIанилу хьусса ва выставкалия зул кказитрайгу чивчуну буссия. Минскаллал Культуралул университетрачIасса галереялий дуруна ттул выставкагу, жул луттирдал презентациярттугу.
Выставка тIитIлатIисса шадлугърайн бувкIуна Белоруснавусса Аьрасатнал вакилханалул 3-сса секретарь Мария Донец, культуралул ва магьирлугърал вузирдал студентътал ва тийх яхъанахъисса жула дагъусттанлувтал. Миннавух ия Белоруснаву хъунмасса хIурмат бусса скульптор, яруссаннал миллатраясса Хизри Асадуллаевгу.
Шиккува бусан ччива, Белоруснал паччахIлугъ ялун дазурду ларкьусса, цивунна цурда ларгсса кунна чIаларчагу, гьарца аралуву ялу-ялун ххуйсса ккаккияртту хъанахъисса, хьхьичIуннай хъит куну нанисса паччахIлугъ дия.
Танил бакI дургьуминнал хъуннасса къулагъас дуллай бусса бия культуралух, магьирлугърах, луттирду, кказит-журналлу итабакьаврих. Школарттай ишла буллансса луттирду итбакьайсса бия хIукуматрал арцух. Нитти-буттал оьрчIан дарсирдал луттирду машан ласайсса бакъая. Халкьуннал кказит-журналлу чичаврил даву хIукуматрал къулагъасрайн ларсун дусса дия. Белоруснал халкь луттирду ккалан, магьирлугърал выставкарттайн, театрдавун, библиотекарттавун занан ххирасса халкь бия.
Мисалдаран, кIира ссятрай лахъи лавгсса пресс-конференциялий телефоннах уругайсса, миннувун уххайсса инсан къавхьуна. ЖучIарами выставкарттай тагьар цамур куццуйсса дикIайхьувкун, махIатталну чIалай бия му ишгу жун. Ттул выставка хьусса та галерея зукъазисса кьини къашайсса дия. Хъиривмур кьини тиву СНГ-лул билаятирттаясса жагьилсса художниктурал суратирттал выставкалийнсса хIадуршинна дуллай бия.
— Творчествалул инсан ухьувкун, ттун кIулли ина тиха цIу-цIусса идеярттащал, цIусса асардащал зана хьушиву. Буси, ссая айишин пикрилий ура?
— Мяйжаннугу, бартлавгун ччисса хияллугу чансса бакъар. Хъинну ччай бур цIана ттула душгу ккалаккисса Художествалул училищалул студентътал Белоруснал культуралул, магьирлугърал вузирдаву ккалаккиминнащал кIул буван, миннал дянив «культуралул ламурду» буллай айишин. Училищалул каялувшиндарайн ва тавакъюращал уккансса кьасттирай ура.
Мукуна пикрилий ура чIал къавхьуну нава зузисса Национал библиотекалий ттула буттал шяраву Гъумук культуралийн багьайсса хIакьинусса масъалартту ххал бигьинсса батIаву дуванссагу. Мисалдаран, Оьргърал шяравасса ттул дустал хIакьину хъунмасса хIарачат буллай бур цалла щарнил тIин-тIааьн, гьану-мина духкъалаган духсса къатри лекьан къаритлай, ми ядаврил хъирив бувккун. Ттунгу ччива мува пикрилущал Гъумучиял вирдакIсса ххазинасса къатри, идарартту мюхчан баврил, буруччаврил цIаний жула лакрал интеллигенциягу цачIун хьуну.
Мукуна цIана зий ура чIявучин бусравсса жула фотохудожник Камил Чутуевлул ппу Амин Чутуевлул суратру цачIун дурсса фотоальбомрал ялувгу. ХъунмурчIин мунал суратирттай яхьуну бур цIа ларгсса Гъази-Гъумучиял щарнил чIалачIиндарал тарихгу. Мунил презентациягу, лахъи гьан къариртун, дансса хияллай ура.
— Марат, дакIнийсса мурадру щаллу хьуну, жува цал ттигу хьунабакьинсса тIайлабацIу хьуннав!
