[dropcap]В[/dropcap]ай гьантрай Дагъусттаннайн бувкIсса Аьрасатнал ЦIуллу-сагъшиву дуруччаврил министерствалул зузалтравух ия къюкIлил къашайшивуртту ахттар дайсса центрданул («НМИЦ кардиологии») хъунама директор, РАН-далул член-корреспондент Сергей Бойцов.
Зулайхат Тахакьаева
Му ялтту увккунни республикалийсса къюкIлил къашайшивуртту хъин дуллалисса идарарттал. МахIачкъала шагьрулул 1-мур азарханалий ванал ххал бунни РЭМДиЛ-лул (рентген-эндоваскулярных методов диагностики и лечения) отделение. Шиккун гьарца кьини «Анаварсса кумаграл» бувцуну букIлай бур инфаркт миокарда хьусса хъинну чIявусса къашайшалт. Дайдихьлахьисса инфаркт миокарда дацIан дансса кьяйда – къюкIлил туннурду бишлашаву цIу буккан байсса – (стенирование) ва отделениелий ччянива ишлану бушиврийн бувну, къашайшалтран цила чIумал кумаг бан бюхъайсса бур.
Ялтту увккунни Сергей Бойцов Каспийск шагьрулул азарханалул кардиоцентрданулгу. Ва азарханалул хъунама хIакиннал буржру чIумуйну биттур буллай ур АьвдурахIин Дибиров. Москавлия увкIун, Лакрал райондалул азарханалул хъунама хIакинну зузисса хIаллай ванал цIа Дагъусттаннал илданун кIул хьуна, зунттаву цIуллу-сагъшиву дуруччаву диялну хьхьичIуннай хъит увкуна. Цайми районнаясса къашайшалтгума кIиккун кIункIу тIий бия.
Хъунама хIакиннал буржру биттур буллай чIуннагу чIарах дукканнин диялсса дахханашивуртту хьуну дур Каспийск шагьрулул азарханалийгу. Сергей Бойцовлулгу ххуй чулий кIицI лавгунни Каспийск шагьрулул цIуллу-сагъшиву дуруччаврил даража, хаснува лавайсса кьимат бивщунни кардиоцентрданул даврин.
