2008 шин. Журналистикалул тарихравун лухIи кьинину дурхсса мартрал 21-сса кьини. Илияс Щурпаев ва ХIажи Абашилов лавмартътурал канил оьрмурдацIа бувсса, кьадаршиврул тIайлашиву аьщун дирзсса кьини.Щаллу-ккурккисса 10 шин ларгунни тания шихуннай.

---

Цалчинмур каналданул корреспондент, Имраннул арс Илияс Щурпаевлун дахьра 30 шин дия. Оьрмулул жагьилсса унугу, гьарица чулуха итххявх­сса, пагьму-гьунар бусса Илияслул цIа машгьурну ва сийлий дия журналистурал дянив, тамашачитурал гъирарай ххал дайва усттарну дурсса ванал репортажру.

Андриана Аьбдуллаева
[dropcap]Л[/dropcap]ичIи-личIисса шиннардий Илияс зий уссия Дагъусттаннал НТВ, ОРТ каналлай. Ва уссия Цалчинмур каналданул Кьиблалул бюрорал МахIачкъалаливсса корпунктрал хъунаману. Нигь-ццах дакъасса, цала пишалух эшкьи хьусса, къуллугърал бурж лавайсса даражалий бартбигьлагьисса журналист ия Илияс.

Ванал цIа машгьур дурну дур Дагъусттаннал, Абхазнал, Ингушнал, Ухссавнил АьсатIиннал «кIирисса точкардаясса» репортажирттал. ДакI ххари хъанан дикIайва укун гьунар бу­сса журналист жула лакку оьрчI ушиврия. ТIайламунихлу талай, майданнив бувксса журналистал кьатI буллалисса, пIякь учин буллалисса заманнай цувагу жандалуцIа хьун бюхъайшиву мунан къабувчIлайгу бакъахьунссия.

Амма Илияс цала бувгьусса ххуллия махъунай къавхьуссар, цала яхIирал бурж ванал лажин кIялану биттур був­ссар. Мунал махъра-махъсса, Абхазиянавусса Новоафонский монастырь цIу буккан буллали­сса давурттаясса репортаж дур­ккун дур мартрал 14-нний Цалчинмур каналданул сайтрай.
ИвчIан ца-кIива гьантлул хьхьичIрив цала блограй ванал бивщуну бур Ингушнаву НТВ-лул ва РЕН-ТВ-лул журналистал баттаврил хIакъиравусса пост.

КутIасса оьрмулий яргсса лажин чирчунни журналистикалул тарихраву миллатрал пахру бан лайкьсса арс Илияс Щурпаевлул. Циксса ххаллилсса давуртту къаданссия мунал ттиния тихуннайгу, цуксса машгьур къахьун­ссия журналистикалул аралуву. ХIайп, цимилагу хIайп…

Аьйшат Щурпаева, нину:
— ХIакьинусса кьинигу ттун арснал цIа учин захIматну бур. Илияс, чIивини икIу, хъуна хьуну махъ икIу, нитти-буттаха аякьа дусса, гъан-маччанай дакI цIуцIисса ия. Мяърипатрал ув­ччусса уссия. Дуклай уссия Да­гъусттаннал университетрал чил билаятирттал мазурдил факультетрай. Амма журналистнал пиша ххуй бизлай ия. Дуклай унува «Новое дело» кказитрайн макьаларттугу чичлан икIайссия. Институт къуртал бувну махъ миннал цачIана увцуна, хъунма хIал къавхьуну кIиччагу Дагъусттаннал телевидениялийн увцуна Руслан Гусаровлул.

Зий 3-4 шин шайхту, Цалчинмур каналданий корпункт тIитIлай, мунил директорну Илияс, продюсерну Алик Аьб­дулхIамидов бивтуна. Ца-кIира шинава ванайн Москавлив оьвкуна.
Цахъи ттигу ингилис мазрал вардиш хьу, логопеднащал зузу кунни, вайннан на дазул кьатIув гьан ан ччай бунуккар тIий, буслай уссия.
Яла, та иш хьусса чIумал, жучIан жижаралий увкIсса Илияслул хъунама Клейменов буслай ия: «Жул ванайн хъуннасса вихшала дуссия, ххуйсса кIанайн хIадур уллай буссияв», — тIий.
Гьарица шинах, Илияс увсса ва аьпалул хьусса кьини, жучIан бияй ванал дустал, архIал зий бивкIсса Руслан Гусаров, Алик АьбдулхIамидов, Мурад Аьбдулмуъминов, Тимур Гусаев, Оьмар МахIаммадов.
Барчаллагьри, жула арс дакI­ний уну тIий.

ХIамид МахIаммадов, Да­гъусттаннал университетрал печатьрал СМИ-лул кафедралул хъунама:
— Илияс хъинну гьавасгу, гъирагу бусса журналист ия. Мунал репортажру усттарсса, асар хьунсса дикIайва. Мунал дюххансса сюжетру дикIайва. Гьай-гьай, гьунар бусса, итххявхсса журналист ччяни хIисав хьуну, мунайн Москавлив оьвкуна.
ХIайп, мунал оьрмулулгу, творчествалулгу ххуллу ччяни бяливчIунни. Та ппурттуву архIала жула дянива лавгунни кIия ххаллилсса журналист — Илияс Щурпаев ва ХIажи Абашилов. Вай кIиягу оьрмулуцIа аву, журналистикалийх дакъа­ссагу, щалагу Дагъусттаннайх­сса рищавуну хьуссар.

Тимур ЖахIпаров, журналист:
— На Илияслущал кIул хьу­ссара 1997-1998 шиннардий. Ттул най дуна мунахух дакI ларгуна. Жу архIал зий бикIайссияв, цимилагу архIал командировкарттайгу лавгссару. Илияс ия ляличIинува итххявхсса жагьил. Ва ия дакI тIайласса, вихшала дишин бучIисса дусгу, коллегагу. Чув, щищал унугу, цува усса куццуйсса ия. На къатIайлану ухьурча, иттату иттав учайва, цува къатIайлану ухьурча, мунийгу мукIру шайва. Журналистикалуву чIярусса шинну къадурнугу, ччяни лахъ хьуна, машгьур хьуна. Яла аргъираймур чIумал бяливчIунни мунал оьр­му, хIайп.

Разита Мушидова, Аьрасатнал ПрезидентначIасса граждан общество хьхьичIуннай даврил ва инсаннал ихтиярду дуруччаврил комиссиялул член:
— На кIул хьуссара Илияслущал, му жучIан М-5 каналданийн зун увкIсса чIумал. Пиш-пиш тIийная цувагу икIайсса. Балики, съемкардайн чIал хьуну, дяъварча, чIиви оьрчI куна пиш-пишгу тIий: «Мабилларда, му вицIун бавкьуну бакъарча», — учайва.
КутIасса оьрмулий яргсса хха кьабивтунни Илияслул Дагъус­ттаннал журналистикалуву.