[dropcap]М[/dropcap]артрал 13-нний Дагъусттаннайн къуллугърал аьрххилий увкIсса АьФ-лул Президент Владимир Путин хьунаавкьунни ДР-лул БакIчинал кIанайма Владимир Васильевлущал.
— Вин утти чIалан бивкIхьунссар Да­гъусттаннай лябукку хьуншиврул ци бан аьркинну буссарив? — цIувххунни билаятрал бакIчинал Владимир Васильевлухь.

Дагъусттаннал БакIчинал кIанайманал жавабран укун увкунни:
— Республикалул хьхьичI бур мадарасса масъалартту. Жу хьхьичIун буккан буллай буру социал масъалартту, биттур буллай буру паччахIлугърал бакIчинал хIукмурду ва бакIрайн лавсъсса буржру. ХIакьину республикалуща цищавагу бюхълай бур тамансса хьхьичIуннайшивуртту хьун дан, — увкунни жавабран Владимир Васильевлул.

Мунал бувсунни региондалий захIмат­шивуртту хьуну душиву, АЗС-ттацIун (заправкартту), базардацIун бавхIуну заллухъруннащалсса ихтилатру хьуну бушиву. Бувсунни мукунма чIярусса къатри дуллай, амма миннуясса налогру дукIлакIаврил тагьар ххуйсса дакъашиву.

— ЦIана жу чялишну зий буру ми масъаларттаха. Агьалинан му чIалай бур, кьимат бишлайгу бур, ялугьлайгу бур. Жу вихь барчаллагь тIутIиссару жуцIунма кабакьаврихлу, — увкунни республикалул хъунаманал.

* * *

Гара кьини Аьрасатнал Президент Владимир Путин хьунаавкьунни республикалул жяматрал вакилтуращалгу.
Хьунабакьаврий паччахIлугърал бакIчинал ххал бивгьунни региондалий­сса иш-тагьарданул масъала. Мунал бувсунни Дагъусттаннал каялувчинащал хьунаакьин хьхьичI кIанттул агьалиначIан увкIун ушиву цал миннащал ххал бигьин агьамсса масъалартту.
Хьунабакьаврий гьуртту хьунни Бущихъиял ва ЦIумадиял районнал вакилталгу.

* * *

Мартрал 13-нний МахIачкъалалив Аьрасатнал Президент Владимир Путиннул каялувшиврулусса батIаврий ххал бивгьунни Дагъусттаннал социал-экономикалул лябуккулул масъалартту.

— ДукIу экономикалул цаппара бутIраву хъин чулийннайсса дахханашивуртту хьуну дур. Масалдаран, промышленнострал производствалул лябукку хьуну бур 15,7 процентрал, 2016-ку шинах бурувгун. Обработкалул бутIа лахъ хьуну бур 19,5 процентрал. Мува бущи яхьуну бур гьашинугу. Му хьхьичIуннайшиву хьуссар обороналул

промышленностьравунсса заказру гьарза шаврийну.
— ДукIу шяраваллил хозяйствалул бакIлахъия гьарзану ларсун дур 5,1 процентрал, му Аьрасатнал даражалий ххуй­сса ккаккияр, — увкунни В. Путиннул.

ПаччахIлугърал бакIчинал кIицI лавгунни демографиялуцIун бавхIусса ма­съалагу. Бувсунни махъсса шиннардий Аьрасатнаву оьрчIру баврил ккаккиярттаву Дагъус­ттан яла хьхьичIунминнавух бушиву.

Республикалул захIматсса масъаларттавасса цану В. Путиннул кIицI бунни Дагъусттан дотациярттайн ва субсидияр­ттайн хъарну бушивугу.

Владимир Путиннул бувсунни, шиная шинайн тIиссакссагу, региондалул бурж хъун хъанай бушиву. Ца захIматсса масъалалун ккалли бунни агьалинан­сса давуртту дакъашиврул масъалагу. Мунал бусаврийн бувну, аьркинни чIиримур ва дянивмур бизнесрахун багьан, фермертурал, кулпатирттал хозяйствартту ва предприятияртту дузал дуллан.

— Хъуннасса къулагъас дуллан аьркинссар социал масъалартту дузал буллалаврих: медициналул давуртту ххуй дуллалаврих, дуккаврил иширттах, даву дакъашиву чан дуллалаврих ва мискинсса кулпатирттах, — увкунни В. Путиннул.