[dropcap]М[/dropcap]ахIачкъалаллал 31-мур школалий хьунни ЯтIул Аьралуннан 100 шин шаврин хас дурсса шадлугърал мероприятие. Ванил сиптачи ва сакиншинначи хьунни, 11-мур школалул ОБЖ-лул учитель АхIмад Юсуповлул каялувшиндаралусса «Вийнни Ватандалул вихшала» тIисса аьрали-патриотътурал клуб.
Андриана Аьбдуллаева
[dropcap]М[/dropcap]икку гьуртту хьунни Дагъусттаннал Ветерантурал советрал председательнал хъиривчу АхIмадхан Нураьлиев, Интербригадалул советрал член, къуллугъ кьабивтсса полковник Маркс Жанаев, генерал-майор Шамил Асланов, МахIачкъала шагьрулул призыврал отделданул хъунама Альберт РахIимов, ВДПО-рал (Всероссийское добровольное пожарное общество) Дагъусттаннал отделениялул председательнал хъиривчу Мариян Мустапаева, Жагьилтурал иширттал министерствалул вакил Марат РахIимов, мукунма шагьрулул школардай ОБЖ-лул дарсру дихьлахьисса учительтал ва ОьрчIал творчествалул къатлул вакилтал.
Ва школалул дуклаки оьрчIал бувсунни ЯтIул аьралуннал тарихрая, Хъунмасса Буттал кIанттул цIанийсса дяъвилий, 1999-ку шиналсса дяъвилул иширттаву, мукунма чил билаятирттай, интернационал бурж биттур буллай, жула аьралитурал ккаккан дурсса къучагъшивурттая, бувсунни Совет Союзрал ва Аьрасатнал Виричунал цIарду ларсъсса дагъусттанлувтурая. Увкунни дяъвилул балайрду, дурккунни назмурду. ОьрчIру Ватан ххирану тарбия баврил даву лавайсса даражалий дуллалисса школардал директортуран ва ОБЖ-лул учительтуран Ветерантурал Советрал дуллунни грамотартту ва барчаллагьрал чагъарду.
Вара даврил лагрулий хьунни «ДакIний уссара ина, Аьрасатнал солдат» тIисса балайрдал ва аьрали композициярттал конкурс. Цаннаяр ца гьунар бусса оьрчIал махIаттал бувсса жюрилун конкурсрал хIасиллу дан бигьану бакъая.
