Буттал кIанттул гьайкаллугу, ми уттара дурмигу мубаракссар

[dropcap]Н[/dropcap]а интернетравун къабуккара. Вай гьантрай даврийсса душварал ккаккан бунни ца лаккучунал гьаз бувсса ихтилатгу, мунащал бяст-ччалли бувксса жула лакрал хъами-оьрчIуннал чивчумургу.
МахIаттал хьуну ливчIунна. Ссал къиялулли ва адиминал илданул хьхьичI укун духIин дакъасса ихтилат гьаз буллалисса?

[dropcap]Ц[/dropcap]иванникьай жула чIивисса, укунмагу дунияллийх кIама бивщусса лакрал миллатрава буклакисса жува цалий къабацIаврил гъалгъардугу, жува кувннал кув къабувгьусса, жуйра жура аьйрду ляхълай, цайминнал хьхьичI дащуй бихьлахьисса ихтилат­ругу.
Циванни адвокатра тIисса адиминал ПартIу ПатIимал гьайкал дукьан дан аьркинссар тIисса махъвагу зумух ласласисса? Ягу ва икIан аьркинни, ПартIу ПатIима къабивкIшиву мяйжан бансса элмулуву, тарихраву цIусса далиллу лявкъуну, ми ахттар буллалисса хIужрарду аьч буллалиману, ягу гьайкал сант дакъа, къаххуйну дурсса дур тIисса искусствовед. Адвокатнал касмулул агьлу, бювкьу хьумигума ххассал буллай, минная бунагьру лиххан банмуних луглайяхха бикIайсса. Ци бунагьри хьусса халкьуннан ваксса хIаллай бусравну бивкIсса, миллатгу, ватангу ххирашиврул символну бивкIсса виричусса душний. Битира му бувагу къабивкIун, ляхъан бувну бикIан халкьуннал. ЧIивисса бурив дунияллул халкьунначIа муку-мукунсса геройталгу, миннан дурсса гьайкаллугу?
Ягу мунал ПартIу ПатIимал цIа абадлий оьрчIал оьрчIайгу сагъну дикIан, мунин гьайкал дан цуппагу хьхьичIну, цаймигу чIарах бизан бувсса Илиясова Мариян тахсирлув буван ччайрив байбивхьусса ми къакру?
[dropcap]М[/dropcap]ариян Илиясовал миллат­рал мазрал ва маданиятрал ххуллий дурцири давурттачIан диянсса щил ци дурссар, му бивкIуну махъ, гьаттайсса аьрщи лаяннин, мукун аьркин ба­къасса ихтилатру гьаз буллан багьарча. Танива, та гьайкал дихьлахьийни цан къабувкссар майданнив ми тIайламур ххирами?
[dropcap]Б[/dropcap]итияракьай, мусил багьасса Марияннул цIа маканиччул дуллардуча. Жуния та жула дянива лагаву бухIан къахъанай буру, уттигу та бакъашиврийн вих хьун къаччай.
«Алши бакъул ккаччи ичIун­май хIап тIун бикIайссар», — тIисса учала буссар лакрал халкьунначIа. МакIура баян булларду жула миллат алши бакъа къатлуйн, махъяхъи булларду жуйва цайми миллатру.
Ванахха шиккува цамургу намусъсса зат: ва кIира-шанна шинни, щийнчIав яржа къабитлай, лакку душ Зарема Бу­ттаева культуралул министр хьуну махъ, муний бювкьу-аьйрду ляхълай булувкьуну жула лак. Тай циярва хьхьичI бивкIсса министрталсса хъаннияр, ларайну дакъа, ца мискьалданул яларайну къадачин дурну бур Зарема Буттаева цила даву.
Буругияра жухвагу, цайминнахгу. Цайминнал, цалами халкьуннал сакин бувсса вирттавраясса бусаларду гьануну лавсун, операрду, пьесарду, оьрчIансса спектакльлу бихьлай буссар. Гьарца шинах хьунадакьайсса лазгиял халкьуннал байрамран цIагума дур «Шарвили».
[dropcap]Ж[/dropcap]ува хьурча, уттинин гьазну, ххирану, халкьуннаву бусравну бивкIмургу букьан бувну, мунилсса буллай бивкIмигу оькки буллай, мунил гьайкалгу лекьан дан аьркинссар тIисса уттизаманнул Герострат кунасса адаминал леххаврий буклаки бувнуру бусса.
Мукун зурча, жувания архну гьан най буру, бюхттулну гьаз хьун най буру. Гьунттинин укканссар цу-унугу цамагу, гьай, Хан-Муртазялигу акъа­ссия тIиссагу.
Дитияра миллатрал пахрунугу, халкьуннал ххазинанугу хъанахъисса суратру кIулну дикIан оьрчIал оьрчIайгу. Ми уттара дан, хъамакъаритан миннуха зий бивкIмигу зия мабулларду.

«Дараччи» клубрал хъаннил цIанияту
Гулизар Султанова,
искусствоведениялул кандидат, АьФ-лул искусствалул лайкь хьусса ишккакку