[dropcap]Б[/dropcap]урандалия мизитраву кIучI хьунни
Американал Орландо мизитрал кьамул бувну бур «Ирма» бурандалия ххассал хьун ливхъун нанисса Флорида штатрал агьлу.Оьсса буран сукку шайхтува, мизитрал имамнал соцсетирдай мизитраву кIучI хьун оьвтIутIисса баян баву дурну дур, гассят ттурша инсан увкIун ур мизитравун. «Бусурман агьулданул жу, дин личIи дакъа, кьамул бунну, гьантлун шамийлла гъилисса дукрагу дуллай, аякьалий ябуллай буру», — тIий ур Салли Киллик.
ЧIинчIулувусса
президент
Сингапурдал президентну бувчIуну бур Малайзиянаву бувсса, бакIрайн хIижаб дуртсса Халима Якьуб. Му билаятрал парламентрал спикерну зий бивкIун бур. Сингапурдал избиркомрал хъунаманал бувсмунийн бувну, президентнал къуллугърайн цIа рищунсса ихтияр диркIун дур ххюцIалунниха ливчусса шиннардий билаятрай каялувшиву къадурсса малайцынахь. Халима Якьуб Сингапурдал тарихраву цалчинсса хъамитайпа-президент хъанай бур.
Бусурман янналувусса Барби-ссихьри
ЦачIунхьу Аьрабнал Эмиратирттаясса ишбажаранчи Самира Амарирдул бусурман янна лархсса ва кьуран ккалаккисса ссихьри дуллалисса предприятие тIиртIуну дур. Цилва душнин машан ласунсса ссихьух луглагисса Самиран бусурман душнил лащиндарайсса ссихьу къаляркъуну дур. Мунилгу, американал Барби гьануну ларсун, аьрабнал лащин дусса, бакIрайнгу хIижаб дуртсса ссихьу ляхъан дурну дур. Ссихьул Кьурандалувасса аятругу буккайсса бур. Ссихьун цIагу цилва душнил Дженна цIа дирзун дур.
Виричусса душ
Бабаюртлив 9 шинавусса Милана Юсуповал цIу ларчIсса къатравату кIива мюрщисса душ ххассал бувну бур. «Нигьа бусаврил, жула къатрал хьулухун бияннин бавагу къабавцIуссияв, цIаравун буххангу сислай бакъаяв, амма, душваврал леххаврил чIурду баяйхту, бацIан къавхьуна», — тIий бур Милана. Виричусса душнин Аьрасатнал МЧС-рал «Созвездие мужества» тIисса фестивальданий награда дулунтIий бур.
Украсса интернет
Европанал Союзрал 120 миллион евролул личIи дувантIий дур вай- файрал терминаллан. «Паркирдаву, школарттай, азарханардай, музейрдаву, жямат ххилаххисса транспортирттай украсса интернет зий дикIан аьркинссар», — тIий бур ЕС-рал цифровой экономикалул масъалартталсса буллалисса комиссар Мария Габриэль.
ХIадур бувссар
П. Рамазановал
