[dropcap]С[/dropcap]ентябрьданул 4-нний ДР-лул ХIукуматрал Председатель Аьбдуссамад ХIамидовлул ххал дунни Дарбантуллал райондалий «Хазарский» тIисса шяраваллил советрай дузрайн дуккан дуллалисса «ФерЭльГам» тIисса инвестициярдал проект.

Вице-премьер Билал Оьмаровлущал, ДР-лул шяраваллил хозяйствалул министрнал хъиривчу ХIайдар Шуаьйбовлущал, райондалул бакIчи МахIаммад Жалиловлущал архIал га кIул хьунни теплицардал комплекс­рал давурттащал. Му инвестициярдал проект дузрайн дуккан дуллай бур «Дагъусттан Респуб­ликалий производствалул ва логистикалул центр дузал баву» тIисса приоритетсса проектрал хъаттиралу.
Премьер-министрнахь бувсъсса куццуй, проект дузрайн ду­ккан дурну махъ Дагъусттаннай зунтIиссар лавайсса даражалул технологиярттал ва утти­заманнул теплицардал комплексру; кIанттул ахъчитураща ласлантIиссар ахънилсса, дузал дантIиссар ахънилсса ва консервартту ядайсса система. Му проект бакIуйн дуккан даврийну республикалул агьали ккуркки­сса шинай щаллу буллантIиссар ахънилссаннул ва цайми шяраваллил хозяйствалул продукциялул.
ЦIанасса ппурттуву 75,5 гектарданий дугьлай бур помидорду, булгъарнал мамаш, нисварти. Июльданул 1-нния шиннай ларсун дур 1100 тонна помидорданул ва 50 тонна мамашрал.
Проект дузрайн дуккан дуллан бивкIукун дузал хьуну бур 250 инсаннансса зузи кIану.
Аьбдуссамад ХIамидовлул тапшур бунни миккува бугьлан нувщи, къур ва цаймигу ахънилсса.
ХIадур бувссар
ХIасан Аьдиловлул