«Илчи»-маслихIатчи

[dropcap]О[/dropcap]ьрчIал кьинилул низам

Дуклаки оьрчIал оьрмулуву кьинилул низам (режим) дуручлачаву хъинну агьамссар: гьарца чулуха лази-лавкьусса, рас ивкIсса шайссар. ЛяличIину агьамссар режим дуруччаву дахьа школданийн занан бивкIсса оьрчIан, вайннан цанницIун ца даркьуну дуллан лахьхьайссар дуккаву ва игьалагаву. Укунсса оьрчIру ссикъабизлазисса, паракьатсса, зун бюхъайсса шай­ссар.

[pullquote]1-2 классирттал оьрчIансса портфельлал кIушиву луттирдащал архIал дикIан аьркинссар 1,5 кг.; 3-4 классирттал – 2 кг.; 5-6 кл. – 2,5 кг.; 7-8 кл. – 3,5 кг.; 9-10 кл. – 4 кг.
[/pullquote]Яла-яла оьрчIал цIуллу-сагъшиву хъар шайссар цуксса хIаллай ва цукун шанай урив оьрчI, ци канай урив ва цукун бажар буну урив. Цала шиннардиха лавхьхьуну шану бакъасса оьрчIал чIярусса цIуцIавуртту ялун личайссар. Бюхъайссар чанну шанашисса оьрчIал оьтту­ву хасъсса гормонну чан хьуну, чурх къабуккангу, ­лякъаук­кангу.

Дуклаки оьрчIан экзамендалул чIумал ва мукунма цамургу бакIрал пикри буллан аьркинсса ппурттуву ца ссятрай бунугу ххишала шанан аьркинссар.

Гьантлун 2-2,5 ссятрал чанну шанашисса оьрчIал дарсирай 30% чан шайсса бур бюхъу цила кьаралданий шанашисса оьрчIаяр.

ОьрчI ххуйну шананшиврулгу гайннан ххуйсса шартIру дузал дан аьркинссар: уттубишин бан цава ца чIумал, 19 ссятрая тинмай аьлагъужа бусса тIуркIурду, кинорду ххал къадуллай.

Щаллу дурну дикIан аьркинссар оьрчIал шардайсса даву щаллу дуллансса шартIру.
ОьрчI щяикIансса стол бишайссар чани кияха багьлан­сса куццуй. Мукунма лампалул чанигу яруннийн щилай бикIан къааьркинссар.
Стол, стул оьрчIан бавкьусса бухьурча, оьрчI ухлан къаикIайссар, къалип (осанка) тIайласса шайссар.

ТIайлану язи бувгьусса портфельгу хъинну агьамссар дахьа школданийн лавгсса оьрчIан.

ТIайлану щаллу дан аьркинссар за дукаврил низамгу.
Дуклаки оьрчIал гьантлун 4-5-лла дукра канан аьркин­ссар.

Дукра канан аьркинссар хIаллих, дукралул чIалачIингу, кьанкьгу, столданий дирхьусса куцгу агьамссар оьрчIан.

Хъунмасса ургъил бан аьркинссар оьрчIал марцIсса гьавалийх сайр баврих.

Сайр баврин, тIуркIурдан бучIиссар харж дан гьантлун 3 – 3,5 ссят.