МахIачкъалалив имам Шамиллул цIанийсса кIичIираву, «Узбекгородок» тIисса кIанай, июльданул 31-нний ахттакьун чIумал «Усттартурал шагьру» тIисса аллея тIитIлатIисса хъуннасса шадлугъ хьунни. Ваний гьуртту хьунни Дагъусттан Республикалул БакIчи Рамазан АьбдуллатIипов, шагьрулул бакIчи Муса Мусаев, республикалул министерстварттал каялувчитал ва тиха –шиха бувкIсса хъамал. Шадлугърайн мукунма бавтIун бия гивах яхъанахъисса чIявусса халкь.

З. АьбдурахIманова
Аллея тIитIлай, республикалул БакIчинал кIицI лавгуна, шагьрулий чIярусса хъин чулиннайсса давурттив дуллай , миннувухра марцIсса щинал шагьру дузал буваншиврул агьамсса давурттаха зий бушиву. КIицI лавгуна ванал, Москавуллал мэриялущал цачIу ххал диргьусса программалийн бувну хъуншагьрулул 60-сса кIичIира бакьин буллай, лахъ къатрал хьхьичIсса хIаятру низамрайн дуцлай бушиву.
«Сайки 15 шинал хьхьичIва ттун пик­ри хьуна каруннил магьирсса, халкьуннал касмурдал авадансса жулла республикалул хъуншагьрулий укунсса ца мурцIу бан. Утти Туризмалул ва халкьуннал художествалул касмурдал министерствалущал цачIу бакIрайн дуккан дарду ва даву. На шагьрулул халкьуннайнгу тавакъю буллай ура- гьуртту хъанахъира шагьрулий дуллалисса цимурца давурттавух. Ва зул шагьрур!», -увкуна БакIчинал.
Хъирив Р.АьбдуллатIиповлул цIа кусса ссятру пишкаш дуруна «Усттартурал шагьру» буллай , ваниха хьхьу-кьини къакуну зий бивкIсса «Спецремстромонтаж», «Горзеленхозрал» зузалтран.
Муса Мусаевлун дуллуна « За любовь к родной земле» тIисса хIурматрал лишан. Яла вайннал ххал бувуна цIуну бувсса аллея ва бивуна халкьуннал касмучитурал дурсса затру тамашалун ва даххан дуккан дурсса павильоннайн.
«Усттартурал шагьру» аллея буллай хьуну бур сайки ца барз. Ванил тиягу-шиягу бордюрду даххана дурну, плиткалул бавкьуну бур. Дургьуну дур тIутIив ва къатIри. Бувгьуну бур мурхьру. Шикку бувну бур Бархъаллал, Оьргърал, УнцIукIуллал, Къизлардал, Табасараннал, ГьаццатIуллал ва цаймигу щархъал усттартурал канил дурсса затру, чIюлушиннарду, матахI, ярагъ бахлан­сса павильонну. Аллеялувун буххайсса ца чулух бувну бур хъунмасса чарил кIалан, мукунна дурну дур чулий бикIан бувсса урхьлува щин экьинанисса чюх. Майданнул дянивгу керамогранитрая накьичир­ттал бувщусса Кьиблалул Дагъусттаннал лишансса «бартбису» бувну бур. Аллея бунийх ча-чунгу чани лахъансса тталлу, щябикIансса кIанттурду ва цIинцI дичинсса къуршивгу бивхьуну бур.
Сентябрьданий кIицI лагантIисса шагьрулул юбилейрал хьунийн бувсса ва аллеялул цIанара шагьрулул халкьуннал дакIру ххари дуллай бур.