Жижара

Рустамлул арс ХIусайнов Карин

Июльданул 6-нний, хархавар бакъасса апатI ялун бивну, жагьилну унува, жуятува лавгунни Хъювхъатусса ХIусайнахъал Рустамлул ва Ханнахъал Рабиял арс Карин.

Карин увну ур Хъювхъиял шяраву 1974-ку шинал. Школа къуртал бувну махъ Каспийск шагьрулий къуртал бувну бур профессионал училище. Мунияр махъ, пограничникну Ссивирнаву аьрали буржгу биттур бувну, зана хьуну ур буттал шяравун. Зун ивкIун ур колхозрал машиналий щупирну.
Гания махъ зий ия Дагъус­ттаннал инкассациялул управлениялий инкассаторну. Махъсса шиннардий ва зий ия, къат­ри дуллай.
Хархавар бакъа Карин жуятува ласаврил кьурчIишиву кIидачIлай, жижара буллай буру Кариннул буттахь Рустамлухь, уссурваврахь, ссурваврахь, душваврахь ва цинявппагу мачча-гъаннахь.
Кариннул бунагьирттал аьпа баннав, рухI алжаннул ххари даннав. Махъминнахьхьун цIуллушиву дулуннав.
Гъанми, маччами, дустал


Хъунмасса барчаллагь тIий буру ва жул уссу Карин ахиратрал хьусса кьурчIишиву кIидачIин жуннийн бувкIсса цинявннахьвагу. Вания тинмайсса зул аьрххи-ххуллу ххуймунийн бакъа къабагьаваннав

Агь, дадай, ххира дадай,
Ина дакъа мукьра шин,
Яру хъяйни, дакI аьтIий
Цукуннугу ларгунни.

«Душрув, бутта аманат!»
Леххаву тIий диявхха,
Алши бакъа ххира арс
Щийн аманат увссия?

Муруллийх ххяхханавав,
Неххавун ххяхханавав,
Ххира арснал дард вища
ДухIан цукун хьунавав.

ХIусайнахъал кулпат,
ш. Хъювхъи


Айдал Аьлихъал МахIаммадлул душ Гьарунова Гьумай

Июль зурул 22-нний, мадара­сса хIаллай къашавайгу бивкIун, аьпалувух бивхьунни дахIалай чинсса зунттал душ, ххаллил­сса хасиятрал ва тIабиаьтрал заллу, МахIаммадлул душ Гьарунова Гьумай.
Гьумай бувну бур 1935-кусса шинал ЧIяйннал шяраву МахIаммадлул ва Жумяълул кулпатраву.
ЧIяйннал дянивмур даражалул школагу къуртал къабувну, ччясса чIумалва нину-ппугу ялату лавгун, Гьумайн багьну бур ккаши-мякьсса дяъвилул шиннардий цищаласса оьрмулул «дяъвилул оьрчIащал», махъун къабагьну, цила уссу МахIаммадлущал чивун бувккун, зий, захIмат буллан
1956-кусса шинал, цила дакIнил лавсъсса Гьарунхъал МахIаммадлун щар хьуну, бивзун бур Буйнакскаллал шагьрулийн.
Зун бувххун бур Горпищекомбинатрайн мукьцIалла шинал мутталий, пенсиялийн букканцIа, Гьумайл давугу даххана къадурну дур. Ванил захIматрал жужрай дурагу кIира чичру дур – кьамул бувсса, ва пенсиялийн тIайла бувксса.
1958-кусса шинал Гьумай кьамул бувну бур Коммунист партиялул членну, цимилагу бувчIун бур шагьрулул бюрорал членну.
Гьумай цимилагу лахъан бувну бур шагьрулул ХIурматрал доскалийн. Ва бия захIматрал ветеран.
Гьумайл ва МахIаммадлул хъунигу бувну чивун буккан бувну бур 4 оьрчI – 2 душ ва 2 оьрчI.
Гьумай бия хъинну инсаншиву дусса, чIаравнан хъинбала бан хIадурсса, ссавур дусса, гъан-маччанахь, лагма-ялттуминнал буруккин байсса хъамитайпа.
Цибанссар, ажалуннин мажал бакъассар — учай. Цила хъирив Гьумайл «ххуйсса-хъинсса» бия тIисса махъру кьабивтунни.
Гьумай дунияллия лагаврил кьурчIишивугу кIидачIлай, жижара буллай буру ванил арсурваврахь, куявтурахь, ссурахъаврахь, цинявппагу гъан-маччанахь.
Гьумайл рухI алжаннул ххари даннав, гьав нурданул дуцIиннав, ванин къабуллумур оьрмулул бутIа махъсса наслулун ххи бувну лякъиннав.
ЧIяйннал жямат


Рамазаннул душ Пикьихъал Муслимат

Тамансса хIаллай къашавайгу бивкIун, оьрмулул 87 шинаву ахиратрал хьунни ххаллил­сса хъамитайпа, Ваччиял шяраватусса МахIач-Рамазаннул душ Пикьиева Муслимат.

Инсаннал чIарав бацIан хьхьичIунсса, давриву усттарсса, тIуллу дугърисса инсан жуятува лагаву хъинну бювххунни.
Мунил оьрмулул ххуллугу илданун бусрав хьун­сса, ма­хъминнан эбратрансса, насихIатрансса бия. Муслимат Ккуллал райондалий хъанахъи­сса гьарца иширавух хьхьичIва-хьхьичI гьуртту шайссия.
Цумур пиша канил бувгьуну зурчагу, гьарца кIанай хьхьичIунну, инсантурал барчаллагь чинну зий бикIайва. Цила дакIнийхтунусса захIматрайну Муслимат цимилвагу лайкь хьуну бур Дагъусттаннал, райондалул ва шяраваллил чулухасса бахшиширттан.
Райондалул агьалинан Муслимат дакIний ливчIссар цIа дурксса балайчи, ххаллилсса шаммардал заллу, бакI-чурх исвагьисса, хасият иминсса, мяърипатрал бувччусса зунттал хъамитайпашиврий.
Муслиматлул узданшиву мунил оьрчIайн, оьрчIал оьрчIайнгу дияннав. Мунил инсантурал дакIурдиву лавхъсса хъиншиврул чирахъ абадлий къалещаннав.
Муслимат ахиратрал шаврил кьурчIишиву кIидачIлай, дакIнийхтунусса жижара буллай буру арснахь Мусахь, душваврахь Асиятлухь, Шарипатлухь, Сусанахь, ванил никирая бивзун наниминнахь ва гъан-маччаминнахь.
Гьав нурданул дуцIиннав, бунагьирттал аьпа баннав, пирдавс алжан булуннав.
Ваччиял жямат