Уттигъанну ДР-лул КIулшивуртту дулаврил ва элмулул министерствалий хьусса пресс-конференциялий министрнал кIицI лавгуна, республикалий ЕГЭ-лул 100 балл лавсъсса 15 дуклаки оьрчI ушиву.
З.АьбдурахIманова
Вай гьантрай чуврив буккав, оьрус мазрал экзамендалун 100 балл лавсъсса Пайзуллагь Юсупов дунияллийх цIа ларгсса МГИМО-рал «Международные экономические отношения. Международный институт энергетической политики и дипломатии» тIисса факультетрайн кьамул увну ур тIий. Ххаригу хьура ттула арс-душ бувхссаксса. БикIувча бакIру бусса, хIарачат бусса жула оьрчIру яла язимининнавух ва хьхьичIунминнавух вузирдаву дуклай.
Пайзуллагьлул къуртал бувну бур ДГУ-рачIасса чIяру профиллал лицей. Хъунмасса барчаллагьрайгу ур, цала чIарав бивкIсса нитти-буттайн акъа, цахьра оьрус мазрал дарс дирхьусса учительтурайн -Наталья Семенцовайн, Шамала Оьмаровайн ва литературалул дарс дирхьусса Светлана Наврузовайн.
«Ттун мяйжаннугу унгу-унгуну дарсирдахун агьан аьркиншиву бувчIуна 10 класс къуртал бувсса ппурттуву. Му чIумал язи бувгьуссия нава уххан ччисса вузгу», -буслай ур Пайзуллагь.
Шиккува кIицI бан, лахъсса баллу ванал, оьрус мазрал бакъасса, бур вайми экзаменналгу. Ингилис мазрал лавсун бур 94 балл, обществознаниялул — 90 балл, профильданул математикалул — 80 балл.
Пайзуллагьлун лицейрал чулуха ххуйсса дуккаврихлу дуллуну дур мусил медальгу.
ЧIа учинну жагьилнан гихунмайгу тIайлабацIу ва кьудрат.
