Июльданул 30-нний, Аьрасатнал Федерациялул Аьрали ва Хьхьирил флотрал кьини, Дагъусттан Республикалул БакIчи Рамазан АьбдуллатIипов гьуртту хьунни Севастополь шагьрулий хьусса Жамирдал парадрай.

Аьрасатнал Федерациялул Президентнал Ухссав­нил Ккавкказуллал Федерал Округрай­сса вакил Олег Белавенцевлущал, ЛухIи хьхьирил флотрал Командующий Александр Виткощал, Къиримнал Республикалул БакIчи Сергей Аксеновлущал, Севастополлал Губернаторнал буржру чIумуйну биттур буллалисса Дмитрий Овсянниковлущал ва жулва билаятрал цайми регионнал бакIчитуращал архIал Рамазан АьбдуллатIиповлул тIутIив дирхьунни Севастополлал шагьрулийсса Нахимовлул майданнив Абадул цIарачIа.
Муния махъ Севастополлал бухталул жамирдай гьаз бунни паччахIлугърал ва аьрали-хьхьирил ттугъру, мукунма – ЛухIи хьхьирил флотрал жамирдайсса ттугъругу. ЛухIи хьхьирил флотрал, Къирим Республикалул каялувчитуращал ва региондалул цаймигу хъамаллуращал архIал Рамазан АьбдуллатIипов ивунни Жамирдал парадрайн ва Аьра­сатнал ВМФ-рал Кьинилун хас дурсса аьрали-спортрал байрандалийн. Байрандалул дайдихьулий ккаккан дунни ЛухIи хьхьирил флотрал тарихрая, аьра­ли ххуллия бусласисса театрал сурат. Байрандалий Рамазан АьбдуллатIиповлул «Жагьилтал патриот зумувну тарбия баврихлу» тIисса АхIмад-Хан Султаннул цIанийсса медаль дуллунни Олег Белавенцевлун, Сергей Аксеновлун ва Александр Виткон. Да­гъусттаннал ва Ингушнал дянивсса дусшиву ва уртакьшиву цIакь давриву бихьлахьисса хъунмасса захIматрахлу Дагъусттан Республикалул «Буттал кIанттухсса ччаврихлу» цIанилусса лишан дуллунни Ингушнал Республикалул БакIчи Юнусбек Евкуровлун.
Хьунни Аьрасатнал эстрадалул, Севастополлал ва ЛухIи хьхьирил флотрал артистътал гьурттусса концерт, Севастополлал бухталул ялув тIурча, дунни артиллериялул салют ва фейерверк.

ХIадур бувссар
Бадрижамал Аьлиевал