Июль зурул 28-нний Дагъусттаннал Виваллил иширттал министр, полициялул генерал-лейтенант Аьвдурашид МахIаммадов ивунни МахIарамккантуллал ва Табасараннал районнайн. Аьрххи-ххуллул мурад бия террористурал оьрмурдацIа бувсса Дагъусттаннал ГИБДД-лул инспектортурал — полициялул лейтенант Давуд ПаттахIовлул ва полициялул майор ХIасан МутIалибовлул наградартту – Къучагъшиврул орденну вайннал кулпатирттавун диян даву.
ДакIнийн бутан, Давуд ПаттахIов оьрмулуцIа хьуссар 2016-ку шинал февраль зурул 16-нний Дарбантуллал райондалий «Джемикентский» пострай шагьиднал взрывчаткалущалсса машина пIякь учин бувсса чIумал. Та кьини Давидлул цала коллегащал бацIан бувссар щак багьлагьисса машина. Машиналуву цIухла бихьлахьисса чIумал му пIякь увкуссар.
МахIарамккантуллал райондалул администрациялул залданувун министрнащал хьунабакьин бувкIун бия райондалул бакIчи Фарид АхIмадов, райондалул актив, ихтиярду дуруччай органнал вакилтал, мукунма Давуд ПаттахIовлул нину-ппу, щарсса ва балугъравун къаивсса арс. Цала ихтилатраву министрнал кIицI лавгунни та кьини Давид ПаттахIовлул цала къучагъшиврийну ва личIлулшиврийну чIявусса инсантал оьзрулия ххассал бувшиву.
Фарид АхIмадовлул барчаллагь увкунни Дагъусттаннал виваллил иширттал министрнахь, МахIарамккантуллал райондалул отделданул зузалтрахь республикалийсса ва райондалийсса тагьар оьлукъин къаритлай тIий.
Министрналгу барчаллагь увкунни Давуд ПаттахIовлул нитти-буттахь, гъан-маччанахь, укун кьянкьасса, къуллугърал ва инсаншиврул бурж бартбигьлай жандалий хIайп къаувкусса арс тарбия увну тIий. Бувсунни цукун ххирану дацIлай дуссарив республикалий паракьатсса тагьар хIасул даву.
— Махъсса шиннардий чIявусса жул коллегахъул оьрмурдацIа хьунни, так ца 2010 шинал къуллугърал бурж бартбигьлай жанну дуллунни 102 виваллил иширттал органнал зузалтрал. Ми жун мудан дакIний бикIантIиссар. ЦIанасса чIумал жу хъуннасса даву дуллай буру республикалий паракьатсса тагьар дуруччаву, полициялул зузалт ва укунмасса инсантал мюхчан баву мурадрай, — увкунни Аьбдурашид МахIаммадовлул.
Къучагъшиврул Орден ПаттахIовлул кулпатирттахьхьун дуллай, министрнал бувсунни ведомствалул зузалт мудангу вайннал чIарав бикIантIишиву, шайсса ка-кумаг буллантIишиву. Ихтилатру бунни райондалул активрал вакилтуралгу. Вайннал кIицI лавгунни ихтиярду дуруччай органнаву къуллугъ буллалисса жагьилсса оьрчIал кьянкьашиву, нигь-ццах дакъашиву, бувсунни ватанлувнал къучагъшиврул эбратрай тарбия буллантIишиву жагьилми. Ихтилатру къуртал хьуну махъ, виваллил иширттал органнал дуллалимуниву чялишсса гьурттушинна дуллай тIий Аьбдурашид МахIаммадовлул райондалиясса ххюя инсаннан дуллунни ХIурматрал грамотартту.
Хъирив министр ивунни Табасараннал райондалийн. Табасараннал райондалул ОМВД-лул хъунама участковый уполномоченный, полициялул майор ХIасан МутIалибов оьрмулуцIа хьуссар 2016 шинал март зурул 30-нний Табасараннал райондалийсса КЗП-лий (контрольно-заградительный пост).
Цала зузалтращал ва бацIан буллай ивкIссар щак багьлагьисса машина. ШупIирнал полициялул зузалтрайн мютIи къавхьуну, бацIан къабувссар машина.
Машиналул пассажиртуравасса ца ивкIун ур террор журалул тахсиркаршиву дурну тIий розыск баян бувсса адимина. Му увчIуну МутIалибов машиналул хъирив агьссар. КIира километр ритайхту хъирив лавну, машиналул хьхьичIун увкссар. Му чIумал тахсиркартурал вайннал чулухуннай пIякь учайсса зат руртссар. ХIасан МутIалибов усса кIанай къуртал хьуссар, мунащал ивкIсса Тарлан АхIмадовлуйн захIматсса щаву дирссар.
ХIасан МутIалибовлул жандалий хIайп къаувкуну теракт хьун къариртссар ва мунийну чIявусса инсантал оьрмурдацIа хьун къабивтссар.
Дагъусттаннал МВД-лул
пресс-служба
ХIадур бувссар
А. Аьбдуллаевал
