Август зурул 4-нний ЦIусса­лакрал райондалул КIулши­вуртту дулаврил управлениялул хъунама Руслан МахIаммадов, ЧС ва ГО-рал хъунама пишакар НурмахIаммад НурмахIаммадов,райондалул азарханалул хъунмур хIакин Людмила Султанова ва райондалул администрациярдал ва кIулшивуртту дулаврил управлениялул пишакартал бакIчисса комиссия байбивхьунни школарттай­сса цIусса дуккаврил шинайнсса хIадуршиннарду ххал дигьлай.

Комиссиялул цалчин ххал бивгьусса ЦIуссаккуллал 1-мур, ЦIуссачIурттащиял 1-мур ва 2-мур, ЦIуссалакрал 1-мур школарттал дянив, цалчинмур ххуттай ккаккан дунни ЦIуссаккуллал 1-мур школалийсса хIадуршинна. Ва школалий цIу буккан бувну, бакьин бувну бур цинявппагу кабинетру, жанахIру ва школалул хIаят ва лагма-ялттусса кIанттурду.
Шиккува кIицI лаган, циняв­ппагу школартту, Президентнал программалийн бувну, дузал бувнур бу­ссар компьютердал ва интернетрал. ЦIуссалакрал райондалий бакъассар цавагу духсса здания дусса школа. Махъсса шиннардий цIуминалийсса цинярдагу ЦIуссалакрал щархъаву бувну бу­ссар уттизаманнул оборудованиялул лащу-щаллу бувсса цIусса школарду. «Образование» миллатирттал проект­рал лагрулий цIуминалийсса щархъавусса школардан буллуссар дук­лаки оьрчIру ххилансса автобусру.
Мукунна, комиссиялул ххал диргьунни школарттайсса столовайр­ттал дузалшиннагу.
Комиссиялул хъуннасса къула­гъас дунни дуклаки оьрчIал мюхчаншиву дуруччаврих. Ххал диргьунни ОБЖ-лул, медициналул кабинетирттал, физкультуралул заллал дузалшиннарду.
ХIадур бувссар И. Саидовал