Июль зурул 30-нний ЦIуминалийсса ТIюхчардал шяраву бивзунни цIусса мизитрал гьану.

Ва ххарисса даврил дайдихьулувух гьуртту хьунни ЦIуссалакрал райондалул бакIчи ХIажи Айдиев, ДР-лул Халкьуннал мажлисрал депутат Амирхан Амирханов, ЦIуссалакрал райондалул бакIчинал хъиривчу Аьбдурашид Буттаев, Дагъусттаннал муфтийнал хъиривчу Идрис-ХIажи, муфтиятрал вакил Аьвдуллагь-ХIажи, ЦIуссалакрал райондалул шяраваллал имамтал ва ТIюхчардал шяраваллил жямат.
Мажлисрал даву дайдихьлай, ЦIуссалакрал райондалул имам Эсенбулат-хIажинал барча бунни ТIюхчардал жямат ва цинявппагу шиккун бувкIсса хъамал.
ЦIуссалакрал райондалул бакIчи ХIажи Айдиевлул барчаллагь увкунни цинявппагу бувкIсса хъамаллурахь ва мизитрал давривух гьурттушинна дурминнахь.
ЦIуссалакрал райондалул имамнал шяраваллил жяматращал кIул унни ТIюхчардал мизитраву цIуну ивтсса имам Аьлибаг МахIаммадов.
Аьлибаг МахIаммадовлун дур 21 шин . Ванал къуртал бувну бур Буйнакск шагьрулийсса Сайпуллагькьадинал цIанийсса исламрал университет.