Июнь зурул 25-нний Дагъусттаннай УИС-рал идарарттайгу кIицI дунни Зумаритавал байран. Дуснакьирттай щябивкIми байрандалущал барча бунни УФСИН-лул каялувчитурал.
Республикалул Диндалул идарарттащал дахIаву дуллалисса комитетрал ва Муфтиятрал вакилтал лавсун бувкIунни колониярттайн ва изолятордавун танмихIрайн бувцуминнан ва зузалтран ссупра тIитIинсса нацIу-кьацIу.
Муфтиятрал вакилтурал дуснакьрал идарарттай щябивкIми Дагъусттаннал муфтий, шайх АхIмад Аьбдуллаевлул цIания барчагу бувну, бунни миннащал байрандалул чак.
Дуснакьравуминнал барчаллагь увкунни цанна байран дан хIарачат бувсса Управлениялул каялувчитурахь ва миннан кабакьу бувминнахь. Цала чулуха Диндалул идарарттащал дахIаву дуллалисса комитетрал каялувчитурахь ва Муфтиятрахь республикалул УИС-рал идарарттащалсса хIала-гьурттушиврухлу, дуснакь бувминнахсса къулагъасрахлу барчаллагь увкунни Дагъусттаннал УФСИН-лул хъунама, виваллил службалул генерал-майор Муслим Даххаевлул.
— Ва цинявппагу бусурманнан ххирасса мубараксса Рамазан зуруй зу дурсса аякьа дуснакь бувминнал оьрмулуву хъиндайдихьуну хьунссар, вай, цайва хьусса тахсиргу лалавсун, тIайласса ххуллийн буккан бансса багьанану хьунссар тIисса умуд бур, — увкунни Муслим Даххаевлул.
