Уттигъанну Къизилюртливсса тарбиялул колониялий ва 8-мур колониялий щябивкIминнащал хьунабавкьунни граждан обществалул институтирттал вакилтал. 

ТанмихIрайн бувцусса хъаннищал ва тарбиялул колониялий щябивкIминнащал хьунабакьин бувкIун бия респуб­ликалул ОНК-лул (общественная наблюдательная комиссия) вакилтал ва председатель Камил Аьбдуллаев, «Аьрасатнал нинухъру» тIисса жяматийсса суккушиндарал региондалул отделениялул вакилтал ва председатель Таисия МахIаммадова, «Дагъусттаннал дакьаврил фонд» тIисса региондалул жяматийсса фондрал председатель Мухтар Даудов, Исламрал ихтиярду дуруччай­сса центрданул вакил Аьбдулла МуташхIажиев.

Мероприятиялул программа дия хъинну авадансса. Дуснакь бувминнал ялапаршиндарал шартIирдащал кIул баву мурад­рай, хъамал бувцунни кIирагу колониялул къатравух. 8-мур колониялул хъунама, виваллил службалул полковник АьлигъалбацI МахIаммадовлущал, Къизилюртуллал колониялул хъунама, виваллил службалул полковник Садигъ Аьбдулаьзизовлущал, УИС-рал идарарттай инсаннал ихтиярду дуруччаврил ялув бацIаву дайсса управлениялул хъунаманал кумагчи, виваллил службалул полковник Рашид Зайнулаьбидовлущал, дуснакь бувминнащал тарбиялул даву дуллалисса отделениялул зузалтращал делегациялул ххал бунни колонияр­ттайсса дукра дайсса ва дукайсса кIанттурду, дуснакь бувми яхъа­нахъисса къатри, кIирагу идаралийсса производствалул цехру, библиотекартту ва чак бай­сса къатри.
Колониялул къатри ххал дурну махъ хъамал хьунабавкьунни дуснакь бувминнащал. Аьбдулла МуташхIажиевлул ва Мухтар Даудовлул маслихIат бунни дуснакь бувминнахь диндалия тIайласса, куртIсса кIулшивуртту ласун, къабяйкьиншиврул, кIул бан ччимунил хIакъираву республикалул Муфтиятрал ва МахIачкъалаллал епархиялул вакилтурахь цIухху-бусу буллан. Цала ихтилатраву Камил Аьбдуллаевлул кIицI лавгунни колониярттай, шивун багьми тIайла бацIан баву мурадрай, хъуннасса даву дуллай бушиву, карантиндалул отрядирттая тIайла хьуну, гьарица дуснакь увманащал зий ушиву психолог. Колониярттай дур дуснакь бувминнал ихтиярдая ва бигардая бусласи­сса стендру, шикку дузал дурну дур багьу-бизулун къулайсса шартIру, ихтияр дуллуну дур дин-чак дуллансса. Дуснакь бувминнал чулуха да­къар багьу-бизулул, медициналул шартIирдал хIакъиравусса рязибакъашивуртту.
Укунсса хьунабакьавуртту республикалул УИС-рал идарарттай аьдатравун дагьну дур.
Хъамаллурал дуллунни кIи­рагу колониялий щябивкI­миннан спортрал кьай-кьуй ва нахIу-нацIурду. Колониярттал хъуниминналгу барчаллагь увкунни хъамаллурахь УИС-рал идарар­ттащалсса хIала-гьурттушиврухлу ва дуснакь бувминнахсса аякьалухлу.
Дагъусттаннал УФСИН-лул пресс-служба

ХIадур бувссар
А. Аьбдуллаевал