Июньдалул 30-нний Дагъусттан Республикалул БакIчи Рамазан АьбдуллатIипов хьунаавкьунни ва шинал школарду мусил медаллай къуртал бувсса дуклаки оьрчIащал ва вайннал учительтуращал.
Шадлугърай мукунма гьурттуну бия ДР-лул ХIукуматрал Председательнал хъиривчу Екатерина Толстикова, кIулшивуртту дулаврил ва элмулул министр Шагьаьппас Шагьов, МахIачкъалаллал мэр Муса Мусаев, ДГУ-рал ректор Муртазяли Рабаданов.
Р. АьбдуллатIиповлул, оьрчIру медаллащал барчагу бувну, кIицI бувунни ххуйсса кIулшивурттал хIасиллу шавриву учительтуралгу биялсса бутIа бушиву.
«Зул хIарачат – зул учительтуралгу кIулшивурттал даража ккаккан бавур. Зу тIайлану, марцIну лавсъсса кьиматру – махъ ппурттуву ЕГЭ-рал хIакъираву жу дурсса дахханашивуртталгу биялар. ЕГЭ дулавриву цIана Дагъусттаннай хьуссар низам. Мукунма цIуну буварду ва бакьин барду ацIвахъул школарду, детсадру ва гихунмайгу зий буру, билаятрал маэшатраву хьусса захIматшивурттах къабурувгун, кIулшивурттал аралул масъаларттаха», — увкунни БакIчинал.
Ванал мукунма кIицI бувунни, республикалий оьрус мазрал ва математикалул ЕГЭ-рду аьмну хьхьарану къадуллушиву.
«Сайки кIилий чан хьуну бур гьашину аттестатру къалавсун ливчIсса оьрчIру. Жула дуклаки оьрчIру бухлай бур билаятрал хьхьичIунсса вузирдавун, тиккугу ккалай бур ххуйсса кьиматирттай. Амма ванийну гьашиву дан къабучIиссар. Мува куццуй лахъ буллан багьлай бур учительтурал пишакаршиврул даража. Хъуннасса даву дан багьлай бур оьрчIаву культуралухсса гъира бутавриву. Культура – му дур инсаниятрал яла марцIми асардал ххазна. Культура ва дуккаврихсса гъира – му кIира цаннищал ца архIал дацIан дан бучIисса затрур. ХIасил, культура инсаниятран аьмсса идеологиялун ккалли дан бучIиссар», — увкунни Р. АьбдуллатIиповлул.
Шадлугърай МахIачкъалаллал №38 гимназиялул дуклаки душ Юлдуз Сейтековал циняв выпусниктурал цIания республикалул каялувшиндарахь барчаллагь кунни кIулшивуртту ласун ччисса, дуклан гъира бусса оьрчIан хIасул дурсса шартIирдахлу ва ва аралух дуллалисса къулагъасрахлу.
«Жун кIулли Дагъусттаннал ХIукуматрал агьаммур мурад республикалул кIулшивуртту дулаврил ара цIудуккан дансса бушиву, кIулли личIи-личIисса проектру щурущи дуллай бушиву. КIулли жулвами буржругу. Ххуйсса кIулшивурттугу ларсун, ялун нанисса жагьилмур ник тарбия дан личIи-личIисса пишардай, арардаву зун зана хьун аьркиншиву. Жу лавсъсса 100 баллаву буссар жул нитти-буттахъал ва учительтурал захIматгу. ХIакьинусса жул хIарачатру – ми гьунттийсса республикалул ва билаятрал хIарачатрур!» — увкунни ванил.
Барча бавурттал ихтилатирттая махъ Республикалул БакIчинал дуклаки оьрчIан цувагу гьурттусса экскурсия дурунни Аьрасатнал миллатирттал Дусшиврул музейравух. Шикку ванал бувсунни халкьуннал инструментирттая, миллатирттал лаххи-ликкулия.
Ахирданий циняв цачIусса суратгу рирщунни.
З. АьбдурахIманова
