Ларгсса нюжмар кьини Аьрасатнал ЦИК-рал ГосДумалул арилчинмур созывравун кьамул увунни Ризван Кьурбанов. Ванайн тапшур дурну дур, цалла цIуллу-сагъшиву сававну хIукуматрал къуллугърая укьан пикри бувсса, КПРФ фракциялул председательнал цалчинма хъиривчу Сергей Решульскийл мандат.
Думалуву ва зунтIиссар Дагъусттан Республикалул цIания.
Муниннин хьхьичI ЦК КПРФ-рал председательнал хъиривчу, ГосДумалул цалчинма вице-спикер Иван Мельниковлул кIицI буллай ур, ца депутат лаглай, ганал мандат цаманахьхьун тапшур даврил хIукму партиялул цала дяниву ххал бигьайшиву ва партиялул вакилтурал Решульскийл пикри хIурматрай кьамул бувшиву. Экспертъталгу Кьурбановлухьхьун мандат дулаврий рязийну бур, цанчирча Думалуву чIярусса шинну дурсса Решульский ивкIун тIий Дагъусттаннал чулуха увчIуну.
Билаятрал хьхьичIунсса политологтурал бусаврийну, Ризван Кьурбанов, депутат хIисаврай, сий дусса, цIюрувкьуми масъалартту щаллу буллай ивкIсса, цала кьянкьасса позиция бусса инсаннан ккаллийну ивкIун ур.
2001 шинал Аьрасатнал Президентнал ХIукмулийн бувну ванан дуллуну диркIссар Чувшиврул орден. Р.Кьурбанов зий ивкIссар Дагъусттаннал прокурорнал хъиривчуну ва Аьрасатнал ЦФО-рал Минюстрал Хъунмур управлениялул каялувчинал хъиривчуну.
ЦIана Аьрасатнал парламентраву зий ур 11 дагъусттанчу. Миннава шама ур яручу (МахIаммад ХIажиев, Оьмахан Оьмаханов, ХIажимурад Оьмаров), кIия лазгиричу (ХIажимет Сапараьлиев, АьвдулхIамид АмирхIамзаев), кIия лаккучу (Аьвдулмажид МахIрамов, Ризван Кьурбанов), ца даргиричу (Мурад ХIажиев), ца къумукь (Заур Аскандаров), ца оьрус (Юрий Левицкий), ца чачан (Бувайсар Сайтиев).
Ризван Кьурбанов цIунилгу Думалул депутатну увчIаву барча дуллай, «Илчи» кказитрал редакция чIа тIий бур ванан дуллалисса давриву тIайлабацIу, цIуллушиву ва дакIниймур бартлагаву!

З. АьбдурахIманова