Июльданул 4-нний Дагъусттан Республикалул БакIчи Рамазан АьбдуллатIипов ивунни «Аьрасат – ттул тарихри» тIисса тарихийсса парк буллалисса майданнив.

Мунащал бия ДР-лул ХIукуматрал Председатель Аьбдуссамад ХIамидов, цалчинма вице-премьер Анатолий Карибов, вице-премьер ХIасан Идрисов, ДР-лул къатри баврил, архитектуралул ва ЖКХ-лул министр Ибрагьим Казибеков, МахIачкъала шагьрулул бакIчи Муса Мусаев.
Аьбдуссамад ХIамидовлул бувсунни Республикалул БакIчинахь парк буллалаву кьянкьасса графикрайн бувну най душиву, цаппарасса давурттив тIурча, ккаккан дурсса чIумуяр хьхьичIгума дуллай бушиву. Объект ккаккан дурсса чIумалнин щаллу дансса ва микку дурсса давурттал даража лавайсса бикIансса махъ буллунни.
Республикалул БакIчиналгу увкунни:
— Ва жулла республикалун хъуннасса агьамшиву дусса объектри. Ца зурувун шикку бикIантIиссар хъунмасса ва ябацIансса центр – чIалай бур ва даву цила чIумал щаллу дуван усттартурал цащава шаймур буллалисса. Музейраву лайкьсса даражалий ккаккан бувну бикIантIиссар Дагъусттаннал халкьуннал культуралул тарихгу.
БакIчинал мукунма дакIнийн бувтунни Ккавкказуллал дяъви къуртал хьуну 155 шин хьуну махъсса тарихраву хьхьичIва-хьхьичI Дагъусттаннай бувшиву культуралул ва тарихрал комплекс «АхIулго» – аьмсса аьпалул ва аьмсса кьадарданул мемориал, цувгу билаятрал Президентнал хъин чулий ккавксса.
— Мунияту му щалавагу тарих, мунивух 1999 шиналсса ишругу, му чIумалсса Владимир Путиннул политикалул ххуллугу, чIалачIи бувну бикIантIиссар шикку. «Аьрасат – ттул тарихри» тIисса цIанилусса музей хьунтIиссар Дагъусттаннал хъуншагьрулул чIюлушиннану. Мунил лагма-ялтту щаллу бувантIиссар шагьрулул агьалинансса паркирал кIану.
ДакIнийн бутан, музейраву дикIантIиссар 3D-инсталляцияртту, панорамалул кинотеатрду ва проекциялул экранну. Шиккун бувкIсса инсантураща бюхъантIиссар жулла республикалул ва жулва билаятрал тарихрал «сагъсса» чIапIив ххал дуллан.

Бадрижамал Аьлиева