Июньдалул 12-нний Аьрасатнал Кьинилун хасъсса шадлугъру МахIачкъалалив най дия личIи-личIисса майданнай. ХьхьирицIсса Родопский бульвардания тIайла хьуну, тяхъашивуртту, концертру, балайрду, къавтIавуртту дуллай бия Оьруснал театрданул хьхьичI ва Р. ХIамзатовлул цIанийсса щалва кучалий.

Шагьрулул администрациялучIасса культуралул, спортрал ва жагьилтурал иширттаха зузисса комитетирттал хIарачатрайну щуруй бия личIи-личIисса спортрал бяст-ччаллу, тIуркIурду ва оьрчIансса тяхъашивуртту. Цавай столданийсса теннисрай буклай буна, гайми бия армрестлинграй, дартсрай буклай.
Мюрщулт бия булувкьуну бульварданул асфальтрай личIи-личIисса рангирдал суратру дихьлай. ОьрчIан ххирасса мультфильмрдавасса персонажтурал янна-калувусса артистъталгу гьурттусса конкурсирттай ва викторинарттай буклай бия.
Сиппатирттай суратру дихьлахьисса проектрал хъунмур Саида Атаевал бусаврийну, аквагрим дан, оьрчIру бакъассагу, хъунимигу гъан хъанай бусса бия. ХъунмурчIин вайннал цала лажинтрай дишин язи дугьлай бия Аьрасатнал ттугълил сурат.
Паркраву билаятрал ттугълил рангру дусса лиссурду дачIлай, ми дахIлай бия волонтертал.
Ахттайнбизулуву ХI. ЦIадассал цIанийсса Яруссаннал театрданул хьхьичIсса майданнив МахIачкъалаллал магьирлугърал школарттал тарбиячитурал ва ОьрчIал филармониялул балайчитурал увкуна балайрду ва дуруна яргсса къавтIавуртту.
ЦIан ларкьуну махъ, байрандалул ахирданий хъуншагьрулул ссавруннайн личIи-личIисса рангирдал салютру итадаркьуна.
З. АьбдурахIманова