ЦIуминалий хьхьичIва-хьхьичI тIивтIусса «Солнышко» тIисса оьрчIал багъраву ччя-ччяни шай личIи-личIисса мероприятияртту. Вай гьантрайгу хьунни оьрчIан апатIру хьун къабитаву, ми ххуллул низамрал тIалавшиннардащал кIул баву мурадрайсса дарсру.
Вай дарсирдай оьрчIан лахьхьин буллай бур тIайлану ххуллу лахъан, ххуллул низамрал тIалавшиннарду дуруччин. Тарбиячитурал дихьлай бур ххуллул низамрая бусласисса ссигърайну, назмурдайну авадан дурсса дарсру. Хъуними группардал оьрчIру гьуртту хьунни ххуллул низамрал тIалавшиннарду, светофорданул рангру, жяматийсса транспортраву зана-кьулу хьун кIулшиву ккаккан дуллалисса викторинардаву.
Садикрал зузалтрал оьрчIан ххуллул низам лахьхьин даврил хIакъираву хъуннасса даву дуллай бур нитти-буттащалгу. Вай масъалартту ххал бигьлай бур нитти-буттал советрал батIавурттайгу. Тарбиячитуралгу, нитти-бутталгу оьрчIру ххуллурдайсса апатIрая буруччаву мурадрай дуллалисса даврил ккаккияртту ххуйсса хъанай дур.

А. Аьбдуллаева