Июньдалул 8-нний ДР-лул Дуккаврил ва элмулул министерствалий «Просвещение» тIисса луттирду итабакьай идаралущал цIакь дурунни республикалул школарттай ишла буллансса луттирдал хIакъиравусса кьутIи. Ва агьамсса чагъарданий къулбасру дурунни министр Шагьаьппас Шагьовлул ва «Просвещениелул» директор Михаил Кожевниковлул.
Му батIаврий гьуртту хьунни шагьрулул цаппара школарттал директортал ва республикалул СМИ-рдал журналистътал.
Шагьаьппас Шагьовлул бувсунни уттигъанну Петербурглив хьусса маэшатрал форумрай Республикалул БакIчи Рамазан АьбдуллатIиповлул ва «Просвещениелул» президент Владимир Узуннул дянив жулла республикалий кIулшивуртту дулаврил даража лахъ баврил хIакъиравусса кьутIи цIакь дуршиву.
«Жу ттинингу издательствалущал хIала-гьурттуну зий бивкIру. Жул пишакартал чIа-чIаннин лагайссия Москавлив хIасул хьусса масъалартту цачIу ххал бигьин, хъирив лаян. Вайгу мукунма, жущал дахIаву дуну, ттинин цимилагу хьуссар жул министерствалий. Мяйжаннугу, республикалул школарттай луттирду биялшиврул тагьар къулайсса дакъар. Так 40 % дузалну бур школартту луттирдал. Махъ шиннардий жуща, чансса бунугу луттирду машан лавсун, школартту щаллу бан бювхъунни. Амма вайгу хъинну чанссар. Гьар шинах республикалийн федерал бюджетрава дучIайссия 300 миллион арцул луттирду ласун. Вай махъсса 10 шинал дянив жу цукун-бунугу жуйнува жува щаллу хъанай буру. Барчаллагьрайгу буру «Просвещение» издательствалийн ттинин жущал зий бивкIун ва вания гихунмайгу зун рязину тIий», — увкунни Ш. Шагьовлул.
Михаил Кожевниковлул кIицI бувунни, Петербурглив республикалул ва цал издательствалул дянив цIакь дурсса кьутIилул лагрулий, ца луттирдалмур масъала бакъасса, щаллу хьунтIишиву, учительтурал кIулшивурттал даража лахъ баймур масъалалия тIайла хьуну, оьрчIал цIуллу-сагъшивруцIун дархIусса давурттал масъаларттугу.
«Дагъусттаннай луттирду биял къахъанахъаврил бур 2 багьана: махъ шиннардий оьрчIру гьарзану бувну, утти миннан хьхьичIминнал луттирду биял къахъанахъаву ва 7 шинал хьхьичI цIуну кьамул дурсса федерал стандартирттайн бувну 1-мур классрая 11-мур классрайн бияннин цIусса луттирдайну ккалай бушиву. РеспубликалучIа, 8 классрая тIайла хьуну, циняв дуклаки оьрчIру цIусса луттирдал дузал бувансса каши къадиркIун тIий. Утти умуд бур жул компаниялуща бюхъантIишиврийн укунсса журалул мурадру дузал хьунмур бан»,-увкунни М. Кожевниковлул.
З. АьбдурахIманова
