Июньдалул 13-нний Владикавказ шагьрулий АьФ-лул ХIукуматрал Председатель Дмитрий Медведевлул каялувшиврулу хьунни СКФО-рал республикарттай школартту баврил хIакъиравусса батIаву.
БатIаврий гьуртту хьунни Аьрасатнал ХIукуматрал вице-премьер Александр Хлопонин, АьФ-лул дуккаврил ва элмулул министр Ольга Васильева, АьФ-лул Ухссавнил Къапкъазуллал иширттал министр Лев Кузнецов, цаппара регионнал бакIчитал. Дагъусттаннал чулуха батIаврий гьуртту хьунни ДР-лул премьер-министр Аьбдуссамад ХIамидов.
Дмитрий Медведевлул, батIаврий махълай, кIицI дунни ххал бигьлагьисса масъалалул захIматшиву: «Жу ва тема личIину ххал дигьлай буру, цанчирча Къапкъазнаву демографиялуцIун дархIусса цила журалийсса тагьар дуну тIий. Шикку оьрчIру гьарзану буллай бур, чIявусса жагьилтал яхъанай бур. Мунияту социал инфраструктура миннал тIалавшиннацIун даркьусса дикIан аьркинссар, хаснува – дуккаврил бутIуву».
АьФ-лул ХIукуматрал Председательнал бувсмунийн бувну, хIакьину Ухссавнил Къапкъазнаву ялапар хъанай бур билаятрал циняв дуклаки оьрчIал сайки 10-мур бутIа, ми хъанай бур 1,2 млн. оьрчIал, амма школартту бур бувагу 3260. 2016-2017 шиннардий шанна сменалул низамрай зий бивкIун бур 61 школа щалва округрал лагрулий. Шамилчинмур сменалий дуклай бивкIун бур 7 азарунния ливчусса оьрчIру. Дмитрий Медведевлул пикрилий, му къаххуйсса цифра бур.
АьФ-лул премьер-министрнал бувсунни масъала чулийн буккан бавриха зий бушиву 2014 шиная шинмай. «Ухссавнил Къапкъазуллал федерал округрал лябукку» тIисса паччахIлугърал программалул лагрулий бувну бур 60-яр ливчусса школартту, ми хъанахъиссар сайки 35 азарваксса ялун ххи хьусса кIанттурду. Гьашину СКФО-рай цIусса школартту бан итадакьин ккаккан дурну дур 5 млрд. къуруш федерал бюджетрава», — увкунни ганал.
Дагъусттаннай зий бур 1454 школа, микку дуклай ур 380 азараксса оьрчI. 1255 школа зий бур шяраваллал кIанттурдай ва 199 – шагьрурдай. 300 школа 50 процентрал бухбувккун бур, 156 бур лекьан хIадурсса тагьарданий. Дагъусттаннал 655 школалий дарсру дихьлай бур 2 сменалий, 22 школалий – 3 сменалий. 2013 шиная шинмай республикалий бувну бур 32 цIусса школа, миву дуклай ур 12566 оьрчI, миннувату гьашину бувну бур 1604 оьрчIансса 3 школа.
ХIадур бувссар ХI. Аьдиловлул
