Библиотекарттал кьинилуцIун бавхIуну, МахIачкъалалив, Расул ХIамзатовлул цIанийсса миллатрал библиотекалий, «Вилла дакI луттирдахух гьан дува» цIанилусса аьдатравун дагьсса луттирдал фестиваль. Фестивальданул мурад бия луттирдал сий гьаз даву, луттирдайхчIин жула оьрчIру Ватан ххирану, буттал улклул тарихрал, жула аслийсса культуралул ва аьдатирттал кьадру-кьимат буну тарбия баву. Шикку гьуртту хьунни шагьрурдал ва районнал библиотекарттал зузалт, чичулт, луттирду итабакьай идарарттал вакилтал, дуклаки оьрчIру, студентътал, бусравсса хъамал. Ккаккиялун бивхьуну бия Миллатрал библиотекалул фондравасса цIуну бувксса луттирду.
— ХьхьичIунсса информациялул технологиярттал замана бувкIун бунугу, жула кIулшивуртталгу, культуралулгу, тIул-тIабиаьтралгу бакIщаращину луттирду хъанахъиссар. Луттирдалли инсаннан дуниял тIитIайсса, — кунни цала хьхьичIмукъуву библиотекалул директор Аьли Аьлиевлул.
ЧIярусса шиннардий ва даврий зий, хъунмасса захIмат бивхьусса библиотекарттал зузалтран бахшишру дунни ДР-лул культуралул министрнал хъиривчу Муслим Телякавовлул. Ванал мукунна дулунни Тарумовуллал райондалул бакIчи Александр Зиминнул цIаниясса грамота Дагъусттаннал халкьуннал шаэр Космина Исрапилован. Луттирдал фестивальданул лагрулий, Экологиялул шинацIун бавхIуну, баян бувну буссия «ТIабиаьтрал рухI-ссихI» цIанилусса конкурс. Аьли Аьлиевлул буллунни конкурсраву ххув хьуминнан дипломру. Циняв хьхьичIунсса кIанттурду бувгьунни Дагъусттаннал художествалул училищалул студентътурал. Фестивальданул лагрулий хьунни цаппара художествалул литературалул ва оьрчIансса луттирдал презентация.
