Дагъусттаннайн увкIунни Аьрасатнавун бухлахисса Азиянал бусурмантурал управлениялул председатель, Аьрасатнал Муфтийтурал советрал сопредседатель Щайхнапигулла Аширов. Ва хьунаавкьунни Дагъусттаннал УФСИН-далул хъунама, виваллил службалул генерал-майор Муслим Даххаевлущал. Хьунабакьаврий мукуна гьуртту хьунни дунияллул халкьуннал дянивсса ва жяматращалсса дахIаву дуллалисса муфтийнал хъиривчу МахIаммад Таштамиров.

— На ивра биялаятрал чIявусса субъектирдайсса исправительный колониярттайн, Дагъусттаннал УИС-рал идарартту ххал буллали­сса чIумал, чIалан бивкIунни ши­кку хъуннасса тарбиялул даву дуллай бушиву. Дагъусттаннал УФСИН-далул сипталий дурсса диндалул вакилтурал ва личIи-личIисса граждан обществалул институтирттал вакилтурал хьунабакьавурттая хъунмасса кумаг хъанахъиссар дуснакь бувми тIайла бацIан бан, ми цивппа обществалун аьркинсса инсантал бушиврий мукIру бан ва гихунмайгу бяйкьин къабитан, — увкунни Щайхнапигулла Ашировлул.
Муслим Даххаевлул бусунни Дагъусттаннал Бусурмантурал рувхIанийсса управлениялул, оьрус­нал килисалул ва УФСИН-далул цачIуну хъуннасса даву дуллай бушиву, республикалул УИС-рал идарарттай щябивкIми тIайласса ххуллийн буцаву мурадрай.
— Дуснакь бувминнащал мюнпатсса ихтилатру буллалиссар килисалул ва бусурманнал ккураннал вакилтурал. ХIакьинусса кьини миннан цукунчIавсса къадагъа дакъа­ссар цала диндалул аьдатру дуллан, — кунни Даххаевлул.
Ахирданий Муслим Даххаевлул барчаллагь увкунни хъамаллурахь, му ххуй-хъинсса мурадрай дуллалисса бусравсса даврихлу.

ХIадур бувссар А. Аьбдуллаевал