Муслиннул арс АхIмадов Амин.
Оьрмулул 79 шинаву Пятигорск шагьрулий аьпалухьхьун лавгунни ххаллилсса чув-адамина, дакI-аьмал уздансса инсан, Гъумучиял шяраватусса Муслиннул арс АхIмадов Амин.

Увну ур Амин 1938-кусса шинал Аминнул арс Муслиннул ва Исял душ Марзил кулпатраву. ­Аьрая ппу инвалидну зана хьуну махъ вайннал кулпат маэшатрал мурадирай бивзун бур Пятигорск шагьрулийн. Тиккува школагу къуртал бувну, 1956-кусса шинал Амин увххун ур Ставрополлал пединститутравун. Му бувккуну махъ ва тIайла увккун ур учительну зун Дагъусттаннайн. Дихьлайгу ивкIун ур оьруз мазрал, литературалул ва тарихрал дарсру Лакрал райондалийсса Буршиял шяраву. Зий ца шин хьуну, кIичча ва увцуну ур цала буттал шяравун Гъумукун. Зий ивкIун ур цал райком комсомолданий, яла – гайра цанна ххирасса дарсру дихьлай школалий. Шиккува кIицI бан, Пятигорскалий дуклакисса чIумала ванал чирчусса оьрус мазрал ва литературалул сочинение школалийгу, шагьрулийгу эбратран дирхьуну диркIун дур хъунмасса хIаллай.
1964-ку шинал Амин увкIун ур махъунай Пятигорскалийн ва 50 шинал мутталийсса оьрму харжгу бувну бур цалва язи бувгьусса пишалун, миннува 25 шинай зий ивкIун ур школалул директорну.
Цува зузисса гьарцагу кIанттай ванал хIалал бувну бур так хIурмат – цала даврил ххаллилсса пишакар хIисаврайгу, ххуй-хъиншиврул виувцIусса инсан хIисаврайгу. Лайкь хьуну ур бусравсса цIардан, грамотарттан.
Аминнун хъинну ххирассия цала буттал кIану, лях гьан къаритайссия царагу шин Лаккуй ца ягу кIива барз къабувсса.
Хъуннасса пашманшивугу кIидачIлай, дакIнийхтунусса жижара буллай буру ванал кулпат Валентинахь, арснахь Мурадлухь, душнихь Сабинахь ва махъсса цинявппагу уссурссуннахь.
Цал бунагьирттал аьпа баннав, рухI бигьаний дишиннав.
Гъумучиял жямат, дустал, гьалмахтал