Дагъусттаннал ФСИН-лул управлениялий зузисса хъаннил дянив хьунни яла авурмур личIи буллалисса конкурс.

Чиннавусса хъаннил дянив хьунни кIулшивурттал даража, къавтIун бизаврил ва балай учаврил, мукунма пистолетрава битаврил гьунар ккаккан буллалисса бяст-ччаллу.
Цалчинсса кьини конкурс хьунни «Орел» тIисса спецназрал базалий. Кьюкьа дурну бацIан бувну, инструктажгу дурну махъ конкурсраву гьуртту хъанахъими бувкIунни тирданувун. Шикку хьунни Макаровлул пистолетрава аьщуйн щун бувну битаврил бяст-ччал. Яла конкурсраву гьуртту хъана­хъиминнал ккаккан бунни УИС-рал даврил хIакъиравусса нормативно-правовой актру цанна цукун кIулну дуссарив. Хьунни лачIун буккаврил ва строевой приемирттал бяст-ччал, дуллунни физхIадуршиндарал нормативрду. Творчествалулмур бутIуву конкурсрал гьурттучитурал бувсунни цала ватандалия. Шикку хьунни мукунна УИС-рал зузалтрал пишалун хас дурсса творчествалул конкурсру, увкунни балайрду, кка­ккан дунни къавтIавуртту, бувккунни цала ляхъан бувсса шеърирду. Конкурсрал чIалачIи бунни респуб­ликалул УИС-ву зузисса хъаннил пишакаршиврул даража, магьиршиву, авуршиву, хIал бакьаву ва творчествалул бюхъу.
Конкурсрал 1-мур этапрал хIасиллу дурну, «Мисс УИС 2017» хьунни виваллил службалул хъунмур лейтенант Саният Мусиева.
— Хъунмасса хIаллай цалийн къабукIлайгу бивкIун, жюрилул хIукму бунни конкурсраву гьур­тту хьусса цинявппагу наградалун лайкьшиврий ккаккан бан. Мунияту жу дарду личIи-личIисса номинацияртту: «Мисс обаяние», «Мисс грация», «Мисс элегантность», «Мисс очарование», «Мисс неотразимость». ЛичIи барду гьарица номинациялий яла яргми, хьхьичIунми, — тIий, буслай ур жюрилувусса УФСИН-лул Ветерантурал советрал председатель Апсаладдин Кахаев.