Бизнес-сообществалул каялувчи Аьвдуллагь Пахруттиновлул пресс-конференциялий бувсунни БИСОМ ассоциациялул иширттал хIакъираву.

Ганал бусаврийну, ванияр 2 шинал хьхьичI хIукму хьуну бур хъун шагьрулул администрациялий батIин шагьрулул циняв ишбажаранчитал. Та чIумал шагьрулул администрациялул хъаттиралу сакин бувну бур МахIачкъалаллал ЧIири ва дянив бизнес лядуккан даврил совет, мунил бакIчинугу ивтун ур Аь. Пахруттинов. Ванал бусаврийн бувну, утти кьинилия кьинилийн БИСОМ-рал члентал гьарза хъанай бур. Гьар зуруй батIайсса бур МахIачкъалаллал ишбажаранчитал цалва масъалартту ххал бигьин.
«БИСОМ-рал даврихун дахчилай дур, цалчин, бизнесраву мунил пишакартал бакъашиву. Бизнес дачин даврил хIал къакIулсса инсантал цаппара хIаллавату, ппанккурутI хьуну, бизнесгу кьадиртун, лагай, ххишала занагу къашай. Му масъала чулийн буккан баншиврул жу тIитIарду бизнес-школа. Гьашину циняв вузирдава жучIа уссия 120 инсан, миннавату батIул арду 25. КIилчин, дахчилай дур республикалий банкру бакъашиву. Иширайну МахIачкъалалив зий бур бувагу 2 банк: «Сбербанк» ва «Россельхозбанк». Амма мигу, монополистътал хьуну, кьянкьасса тIалавшиннарду дихьлай бур бизнесрал хьхьичI. Мунияту жун республикалий аьркинну бур чIири ва дянив бизнесрал мурадру щаллу буллансса банк. Мукунсса банк бур, жу му банкирал вакилтуращал маслихIатру ккаклай буру. Шамилчин, бизнес дурурччуну дикIан аьркинссар. Агарда вай шанмагу масъала чулийн буккан барча, Дагъусттаннай бизнес цIусса даражалийн гьаз хьунтIиссар», — увкунни Аьвдуллагь Пахруттиновлул.

ХIасан Аьдилов