Июнь зурул 5-нний ЦIуминалийсса ЦIуссаккуллал шяравусса ЦIуллу-сагъшиврул центрданий хьунни унгу-унгусса спортрал байран. Райондалул цинярдагу щархъая акробатикалул бяст-ччаллаву гьуртту хьун бавтIун бия оьрмулул мукьра шинава байбивхьусса мюрщи спорстментал.

ЧIявуми оьрчIал, душваврал оьрмулуву вай цалчинсса бяст-ччал бухьунссия, бюхъай вайннул тIитIин цаппарассаннан спортравунсса ххуллугу.
Ва Центрданийгу, Чапаевкаллал школалул спортзалданувугу чIавасса оьрмулул оьрчIру гимнастикалул ва акробатикалул спортрахун бивчуну, миннащал зий бур физкультуралул учитель ва ЦIуссалакрал ДЮСШ-лул тренер ХIусайнова Анисат. Ванил хIадур бувсса оьрчIру уттинингу райондалул соревнованиярттай хьхьичIунсса кIанттурду бувгьуссар. Райондалийсса сайки цинярдагу шяраваллава най бур АнисатлучIан оьрчIру бувцуну.
Ва кьинисса акробатикалул бяст-ччаллу сасин бан кумаг бувну бия спорт ххирасса ишбажаранчи Оьмаев Аьлиханнул.
Бяст-ччаллу къуртал хьуну махъ цинявппагу ххув хьуминнан дуллунни медаллу, дипломру ва бахшишру.

И. Саидова