Май зурул 23-нний Аьрасатнал правовой академиялуву хьуссия уголовный праволул республикалул олимпиада. Шикку гьуртту хьуна республикалул хьхьичIунсса 4 вуз, аьмну 100-нийн бивсса студентътал. Шикку хьхьичIунсса кIанттурду бувгьусса Аьрасатнал правовой академиялул Ухссавнил Ккавкказуллал институтрал ва Дагъусттаннал университетрал юридический факультетрал студентътал гьуртту хьунни май зурул 26-нний Москавлий хьусса финалданул турданий.
Шинал лажиндарай Аьрасатнал студентътурал дянивсса юридический олимпиада шанна этап­рай шайссар. Цалчинсса турданий, региондалул этапрай, ххув хьуми гьуртту шайссар кIилчинмур округ­рал турданий. Шикку хьхьичIунсса кIанттурду бувгьуми тIайла бу­ккайссар финалданул турданийн. Укун аьлтту байссар щалагу билаятрайсса хьхьичIунсса студентътал. Вай студентътуравух бур Аьра­сатнал правовой академиялул Ух­ссавнил Ккавкказуллал институтрал студентъталгу. Лавайсса даражалул кIулшивуртту ккаккан дурну, «уголовное право» номинациялий цалчинсса кIану бувгьунни Сапарбаглул душ Мирзаханова Лейлал. «Уголовный праволул темалийсса эссе» тIисса номинациялий ххув хьунни Давудлул душ Давудова Диана. «Граждан ва правовой темалийсса эссе» номинациялий кIилчинсса кIану бувгьунни Казимирдул душ Загьирова ПатIимал.
«Уголовный право» номинациялий кьимат бишлашисса жюрилувун увчIуну ия Аьрасатнал правовой академиялул Ухссавнил Ккав­кказуллал институтрал преподаватель Амирхан Амирханов.
Дагъусттаннал студентътурал укунсса ккаккияртту чIалачIи даву – ва хъуннасса ххаришивур, пахру бансса ишри. Умуд бур вайннал уттиния тихуннайгу цала кIулшивурттайну, бюхъу-бажарданийну Дагъусттаннал цIа машгьур дулланссар тIисса.

А. Аьбдуллаева