Майрал 25-нний Каспийскаллал Хъунмур библиотекалий хьунни «ХIала-гьурттушиву» тIисса цIанилусса Культуралул ва бигьалагаврил центрданийсса ирглийсса батIаву.
ХьхьичIвагу чивчуссия ва центр бугьарасса, цивппалусса инсантуран куну тIивтIушиву. Шивун бучIайсса инсантурахь цIухху-бусу бувну, кIул бувссия вайннан щищал хьунабакьин, ци ихтилатру буллан ччай буссарив.
— Оьрмулул бугьараминнал дакIниймур хIисавравун ласунтIиссар. ХIакьинусса хьунабакьавугу хъанахъиссар му даврил дайдихьуну, — увкунни Центрданул каялувчи Таиса МахIаммадовал.
Центрданийн заназисса хъунисриннал тавакъюрайн бувну, ва батIаврийн оьвкуну бия Каспийскаллал Территориал бувчIаврил комиссиялул председатель Л. Перцевайн ва хIакин-терапевт Н. ГъазимахIаммадовайн. Перцевал бувсунни 2018 шинал март зуруй хьунтIисса Аьрасатнал президентнал бувчIавурттая, ми Каспийск шагьрулий цукун хьунтIиссарив, инвалидтуралми ихтиярду цукун дуручлай, щаллу дуллай буссарив. ХIакин Насарат ГъазимахIаммадовахьхьун булунми суаллугу къачанъя ва кьини, цIуллу-сагъшивруцIун бавхIусса.
Мажлис бачин бувсса Зугьра Аьбдуллаевал бувсунни майрай кIицI лагайсса байранная ва кьинирдая.
Шадлугъравух мукунма гьуртту хьунни шагьрулул 11-мур оьрчIал багърал мюрщулт ва «Сагъсса классика» цIанилусса конкурсрал дипломант Жарият Буттаева.
Бадрижамал Аьлиева
