Ххувшаврил байрандалул гьантрай Дагъусттаннал МВД-лул медсанчастьраву хьунни ххаллилсса мероприятие. ТIивтIунни вирттаврал аьпа абад буллалисса аллея.

Шикку, Вирттаврал ва дяъвилул ветерантурал цIарду абад дуллай, бувгьунни 19 мурхь. Ва уздансса даврил сиптачи ия медсанчастьрал хъунама ПахутIал арс МахIаммад МахIаммадов.
Аллея тIитIавриву гьуртту хьунни ДР-лул виваллил иширттал министр Аьвдурашид МахIаммадов, ванал хъиривчу Анатолий Карпов, ДР-лул цIуллу-сагъшиву дуруччаврил министр Танка Ибрагьимов, Дагъусттаннал УФСИН-далул хъунама Муслим Даххаев, ДР-лул УФСВНГ-лул хъунама, Аьрасатнал Виричу МахIаммад Баачилов, ДР-лул Мюхчаншиврул Советрал секретарь Абумуслим Абумуслимов, ДР-лул МВД-лучIасса Жяматийсса советрал председатель Багьауттин МахIаммадов.
Гьарца мурхь бувгьусса кIан­ттурдайгу дацIан дунни Виричунал цIа чирчусса ула. Вир­ттаврал аллея бансса хIадуршинна дуллай, медсанчастьрал зузалтрал хъунма­сса захIмат бивхьуну бия. Шикку бугьансса багьлул ххира­сса мурхьру бучIан бувну бия дазул кьатIату.
— Укунсса даву Ххувшаврил байрандалул гьантрай давривугу цила тIилисин буссар. Жува та Бюхттул­сса Ххувшаву ларсминнал наслуру. Жула буржри тайннал аьпа буру­ччин. ТачIавгу хъамакъабитантIиссар жунма къуллугърал бурж биттур буллай жанну дуллусса жула коллегахъул. ХIакьину, вайннан цIа куну, бувгьусса вай кIюласса мурхьирдал мархри шиная шинайн цIакь хъанантIиссар, вирттаврал аьпа абад буллай, — увкунни Аьвдурашид МахIаммадовлул.
Хъирив Аьвдурашид Ма­хIаммадовлул дурккунни аллеялий абад уллалисса 19-гу виричунал цIа.
Мурачуев Халид
Исяев Мутай
НурбахIандов МахIаммад
Илиясов Арзулум
МахIаммадтIагьиров Адильгерей
Оьмаров МахIаммад
Аьвдулманапов МахIаммадзагьид
МахIаммадов Аьвдулмалик
Аскеров Аскер
ХIажиев Гапал
Кураев ХIажи
МахIаммадов АхIмад
Оьмаров Микаил
ХIусманов МахIаммад
Подвальный Сергей
МахIаммадов ШагьмахIаммад
МахIаммадов Адильгерей
Чумчалов Жабраил
АьвдурахIимов МахIаммадшамил
Аллея тIивтIуну махъ циняв­ппа бувххунни медсанчастьрал суратирттал галерея ххал дан. Шикку дия медсанчастьрал хIакин-методист, Дагъусттаннал лайкь хьусса художник МахIаммад Бахричиловлул дирхьусса 100-нния лирчусса суратру. Вай суратирттавух дур медсанчастьрай зий бивкIсса хIакинтурал, искусствалул ва политикалул аралуву цIарду машгьур дурсса инсантурал портретру. Авадансса галерея ххал дурну махъ цала асардая чивчунни бувкIминнал чичрурду дайсса лу­ттирай Муслим Даххаевлул, Багьауттин МахIаммадовлул ва цаймигу хъамаллурал.
А. Аьбдуллаева
И. Саидова