Май зурул 8-нний, гьарица шинах кунна, щала щарнил жяматгу бувккун, бюхттулсса даражалий хьунадаркьунни Ххувшаврил байран Ккурклив.

Андриана Аьбдуллаева
Байрандалул мажлисрай гьур­тту хьун бувкIун бия шагьрурдаясса ва лагма щархъаясса чIявусса гьалмахтал, бусравсса хъамал.
ЦIа ларгсса Ккурккуллал ккур­чIа чIюлу бувну бия байрандалун хасну. Лагмара дацIан дурну дия дяъвилия зана къавхьусса Ккур­ккуллал вирттаврал суратру. Миннала чIарав дия Ххувшавугу ларсун аьрая зана хьуминналсса. Оьрмулул аргъиравусса 129 ккуркличу лавгун ур аьрайн Ватан душманная хха­ссал дан. Минная зана хьуну ур увагу 60 инсан.
Буттал кIанттул цIанийсса дяъвилий талай бивкIминнал аьпа абад бан шяраваллил ккурчIай дацIан дурну дуссар лухIисса мармарчарил гьайкал. Ххувшаврил байрандалул кьини гьайкалданучIа бавцIуну дуклаки оьрчIал бюхттулну дуккай­ссар Ватан душманная дуручлай бивкIсса вирттаврал цIарду. Ккур­ккуллал школалул аьрали музейраву буссар гьарицаннан хас був­сса, миннал оьрмулия бусласисса суратирттащалсса альбомру. Ва кьини, ми альбомругу бувгьуну, дуклаки оьрчIру буккайссар байрандалийн бавтIсса жяматрал хьхьичIух ккурчIнил лагма.
Ккурклив гьарица шинах, бургъи-гъарах къабурувгун, марч бур, дяркъу дур къаувкуну, лахъа-хъунну тIайла дуккайссар Ххувшаврил байран.