Хъунмасса Буттал кIанттул цIанийсса дяъви байбивхьусса чIумал Ватан душманная дуруччин лавгун зана къавхьуминнавасса ца ур Читтурдал шяравасса Аьбдулмажидлул арс СалихI ХIасанов.
Андриана Аьбдуллаева
Дяъви байбивхьусса чIумал СалихI ивкIун ур Пензаллал областьрайсса Маршатек тIисса шагьрулий цала дуссукъатта тIивтIуну. Мичча хушрай лавгун ур дяъвилийнгу. СалихI цувагу партиялул членну кьамул ансса кандидат ивкIун ур. Таний партиялувунгу цу-унугу кьамул айсса къаивкIссар. 
Противотанковый батареялул 102-мур танкирдал бригадалуву СалихI талай ивкIун ур яла дяъви къизгъинний – Брянскаллал, Воронежуллал, Сталинградуллал, Донской ва Юго-западный фронтирттай. Дяъвилия цала кулпатрачIан ИттачIан ва чичлай ур:
Дуниялгу ччучлай дур,
Дяъвигу къизгъинсса бур,
Буттал кIану буручлай
На оь экьи бутIинна.
Ягу цIаравун ххявххун
«Виричу» цIа ласунна.
1943 шинал август зуруй СалихIлул, цала тIийкун, виричунал кунна жан дуллуну дур Курскаллал дугалийсса къизгъинсса талатавриву. Ганал хъаражипливу архIал талай бивкIминнан лявкъуну бур Лаккуяту гъанчунал Эльдардул дуркIсса оьттул гъулуртусса открытка. Мунил махъ «Курскаллал чIаравсса Покровка тIисса шяравалличIа Ватан душманная тархъан дуллай виричунал кунна жан дуллунни» тIий чивчуну, открытка махъуннай Лакрал военкоматрайн тIайла дурккун дур 1943 шинал апрель зуруй. ХIакьинусса кьинигу му яхьуну дур СалихIлул арсначIа АьбдулмуслимлучIа. Увччуну ур СалихI Покровка тIисса шяравусса уссушиврийсса гьаттаву. СалихIлул бивкIун бур мукьва оьрчI: шанма душ ва ца арс. Ва аьрайн лавгсса чIумал арс дахьра шин ва дачIи хьусса чIивитIу ивкIун ур.
1982 шинал Аьбдулмуслим лавгун ур цала кулпатращал, оьрчIащал буттал гьаттайн иян. Дунияллийх цIа дурксса Курскаллал дугалий хьусса къизгъинсса талатавриву ливтIусса азарахъул вирттавравух бюхттулсса мармарчарил гьайкалданий СалихIлул цIагу чирчуну дур.
Гьай-гьай, мукьва-мукьва оьрчI ччаннай бацIан бан ниттин бигьану бивкIун бакъар ккашилсса, мякьсса, лахха-ликкан дакъасса дяъвилул шиннардий. Цимилагу увкIун ур шяраваллил советрал председатель ИттачIан оьрчIру Гъумукун детдомравун була тIий. «Нара сагъну дуссаксса, на вай детдомравун гьан къабантIиссар, ххишала ттучIан мукун тIий маучIара», — увкуну бур Иттал.
Хьхьувай шану бакъа, адаминал баймургу, хъаннил баймургу буллай, ччаннай бацIан бувну бур оьрчIру Иттал.
Уттигъанну, Ххувшаврил байран хьулухун дирсса гьантрай, СалихIлул оьрчIан ХIасанов Аьбдулмуслимлун, душнин ХIасанова (Къушиева) Айманатлун, цинявппагу СалихIлул гъан-маччанан бавунни ххарисса хавар. Богатыревка тIисса шяраваллил цIанийсса къизгъинсса талатавурттаву ккаккан дурсса къучагъшиврухлу ХIасанов СалихIлун дулун ккаккан дурну диркIшиву «За отвагу» медаль. Му ашкара бунни Обороналул министерствалул Центральный архиврал интернетрайхчIин.
Укун чивчуну бур наградной чIапIуй:
Гвардиялул красноармеец ХIасанов СалихI Аьбдулмажидовичлул Богатыревка тIисса шяраваллил цIанийсса талатавурттаву ккаккан дурну дур ляличIисса къучагъшиву. ХIасанов хIаласса аьралитурал артиллериялул ва минометирттал цIу тIиртIуну, кIийла душман айщун увну ур. Ккуллардал цIарава ярагъгу буккан бувну, цIунилгу душман кьатI буллай булувкьуну бур. Вайннал бат бувну бур душманнал пушкарду, 70-нния ливчусса саллатI ва хIаписартал.
Гвардиялул красноармеец ХIасанов лайкь ссар ХIукуматрал наградалун – «За отвагу» медальданун.
Противотанковый батареялул 102-мур танкардал бригадалул командир, гвардиялул капитан Очинелия.
9.2.1943
Награда дулунсса хIукму цIакь буллай, къулбас дурну дур 102-мур гвардиялул танкардал бригадалул командир, гвардиялул майор Охрипиенкол (фамилия цахъи дахханану чирчуну дикIан бюхъайссар, хIарпру ххуйну дурчIлай дакъашиврийн бувну – А.А.).
1943 ш.
Амма ва медаль, ци багьана-савав хьуссарив, СалихIлул оьрчIачIан дирну дакъар.
— Бюхъай, бутта Пензаллал областьрая лавгун ухьувкун дяъвилийн, тийх луглай бивкIун бикIан ванал гъан-маччанах, — тIий бур СалихIлул душ Айманат.
ЦIана СалихIлул оьрчIру, оьрчIал оьрчIру къучагъшиврий жан дуллусса буттал, ттаттал наградалул хъирив буклай бур. Умуд бур му ччясса чIумуй диянссар виричунал наслулучIан тIисса.
