Ларгсса нюжмардий лахъа-хъунну цилла даву дайдирхьунни Дагъусттан Республикалул Халкьуннал творчествалул къатлул 80 шинал юбилейрал хьунийнсса шадлугъирттал декадалул.
Бадрижамал Аьлиева
Ми шадлугъирттаву ца яргмунин ккаллисса дунияллул халкьуннал дянивсса IV «Каспий – дусшиврул зумарду» фестиваль тIиртIунни апрельданул 28-нний Оьруснал театрданул хъунмур залдануву. Театрданул фойераву дия «Ттул Дагъусттан – ттул Аьрасат» цIанилусса фотовыставка, мукунма республикалул халкьуннал аслийсса культура, багьу-бизу, канил пишарду ккаккан буллалисса мурцIурду.
Фестивальданувух гьуртту хьунни Аьрасатнал регионнаясса ва Каспий хьхьирил зумардацIусса паччахIлугъирттаясса творчествалул коллективру.
Фестиваль тIитIлай, махъ лавхъунни ДР-лул ХIукуматрал Председательнал цалчинма хъиривчу Анатолий Карибовлул. Цалва ихтилатраву мунал барча бунни Республикалул Халкьуннал творчествалул къатта ххаллилсса юбилейращал, дурккунни ЮНЕСКО-лул генеральный директор Ирина Боковал, АьФ-лул ЮНЕСКО-лул иширтталсса байсса Комиссиялул жаваблувсса секретарь Григорий Орджоникидзел, ПаччахIлугърал Думалул Культуралулсса байсса комитетрал председатель Станислав Говорухиннул, АьФ-лул культуралул министр Владимир Мединскийл, АьФ-лул Халкьуннал творчествалул къатлул директор Тамара Пуртовал ва цайминнал цIардаятусса барча бавуртту.
Официал бутIуву мукунма махъ лавхъунни КъавтIавурттал Дунияллул халкьуннал дянивсса фестиваллал федерациялул (FIDAF) Генеральный секретарь Димитров Емиллул (Болгъарнавасса).
Фестиваль тIитIлатIисса гала-концертравух гьуртту хьунни жулла республикалул сайки гьарцагу райондалиясса, миннувух лакрал шаннагу райондалияссагу, творчествалул коллективру, мукунма Ираннавасса, Къазахъисттаннаясса, Азирбижаннаясса, Ставрополлал крайраясса, Къабардин-Балкьарнавасса, Къарачай-Чаргаснавасса, Ингушнавасса, Чачаннавасса, Ухссавнил АьсатIиннавасса, Якьутиянавасса, Къиримнал Республикалиясса ва Аьрасатнал цаппарасса шагьрурдаясса коллективру. «Традиция» тIисса цIанилу хьусса концертрай ккаккан бунни Дагъусттаннал ва цаймигу регионнал ва паччахIлугъирттал аьдатру, багьу-бизу, культура чIалачIи дуллалисса номерду.
Оьруснал театрданул хъунмур залданул сахIналийра хьунни аьдатравун дагьсса байран «Халкьуннал лаххиялул поэзия» тIисса. Республикалул районнаясса коллективирттал ккаккан дунни жулва миллатирттал янна-ка.
Хъиривмур кьини, апрельданул 30-нний «Каспий – дусшиврул зумарду» фестивальданул лагрулийсса концертрал программа ккаккан дуллалисса хъуннасса байран хьунни Дарбантлив Нарин-Къалалийгу. Микку хьунни «Пагьламан» ва «Балай уча, аьшукь» тIисса фольклорданул байранну.
Фестивальданул хъамаллуравух бия Аьрасатнал ПаччахIлугърал Халкьуннал творчествалул къатлул директорнал хъиривчу Мэри Русланова, АьФ-лул Культуралул министерствалучIасса паччахIлугърал Искусствалул ва халкьуннал творчествалул чIарав бацIаврил департаментрал пишакар-эксперт Галина Марахтанова, оьруснал халкьуннал янна-ка, костюмру датIлатIисса, цIа дурксса Сергей Глебушкин, Къиримнал ва Аьшттарханнал областьрал халкьуннал творчестварттал къатрал бакIчитал Наталья Жинкина, Алла Занина ва цаймигу.
Фестивальданул лагрулий МахIачкъалаллал Музыкалул училищалий ва Миллатрал библиотекалий хьунни мастер-классру, элмийсса ва практикалул конференцияртту, концертру, хьунабакьавуртту.
Фестиваль лакьлакьисса «Аьрасат – ттул Ватан» цIанилусса хъуннасса яргсса концерт хьунни апрельданул 30-нний Оьруснал театрдануву.
Майрал 1-нний тIурча, ва фестивальданувух гьуртту хьусса коллективру хIалану, Оьруснал театрданул хьхьичIсса майданнив хьунни регионнал дянивсса халкьуннал творчествалул фестиваль «Къапкъаз – цасса кулпат».
