Учительнал бусравсса цIа лайкь дурминнавасса ия Хъюллал шяравасса Мусал арс Рашид МахIаммадов. МяйцIалку шиннардий, МахIачкъалаллал 3-мур школалийн практикалийн бувкIсса чIумал, кIул хьуссияв на хьхьичIва-хьхьичI Рашид Мусаевичлущал. Ва коллективраву ва дуклаки оьр­чIачIа хъинну хIурматрайсса учитель ия.

Андриана Аьбдуллаева
Дуклакиминнал, кIулшивуртту ласун гъира буминнал хIурмат ваначIагу бия. Жухь, практикалийн бувкIсса студентътурахь, буттал кунмасса насихIатру байва. Рашид Мусаевичлул 43 шин дурну дур ва ца школалий зий. Мунилгу барашинна дуллай бур ва коллективрангу, каялувчитурангу бусравну ивкIшиврул.
Шяраву 9 класс къуртал бувну махъ ва лавгун ур аьралуннаву къуллугъ бан. Шанна шинай Германнаву аьрали бурж лахълайгу ивкIун, зана хьуну махъ 9 классрал кIулшивурттай гьашиву дан къа­ччай, 21 шинаву цIунилгу школалийн лавгун ур. Бархъарав 10 класс­гу бувккуну, увххун ур Дагъусттаннал университетрал тарихрал факультетрайн. Му къуртал бувну махъ ва тIайла увккун ур зун Ахъу­шиял райондалийсса Уссищиял шяравун. Шанна шинай Уссищиял школалий, кIира шинай Урхьхьучимащилий зийгу ивкIун, 1968 шинал увкIун ур МахIачкъалаллал 3-мур школалийн. Мунияр махъ 2011 шинайннин ва школалий зий ивкIун ур. МукьцIаллихъайсса шиннардил лажиндарай Рашид Мусаевичлул кIулшивуртту дуллуну дур цимирагу никирал оьрчIан. Цала выпускниктурал оьрчIал оьрчIахьгума дарс дирхьуну дур Рашид Мусаевичлул.
ЧIярусса шиннардий бивхьу­сса захIматрахлу ванан дуллуну дур «ДР-лул лайкь хьусса учитель» тIисса ва «Аьрасатнал кIулшивуртту дулаврил хIурматлувсса зузала» тIисса бусравсса цIарду.
— Бутта шавагу гава учитель ия, дуклаки оьрчIаясса тIалавшиннарду, жуягу дикIайва. Буттал сий хъунна­сса дия, мунал махъ къулагъас къадурну битан къашайва, — тIий ур Рашид Мусаевичлул арс АхIмади.
Хъунмур оьрму шагьрулий лавгун бунугу, Рашид Мусаевичлун хъинну ххирасса диркIун дур бу­ттал шяравалу, тачIавгу арх къаувцун ур буттал къатлуя. Гьарица шинах отпускалий лагайсса ивкIун ур Хъюлив, дакьин дурну, цIу дуккан дурну дур шяравусса къатри. Цува къашавай хьусса чIумалгу, оьрчIайн аманат бувну бур шяравусса къатри макьаритару куну.
— ИчIаллил масъаларттаву, оьрчIру тарбия бавриву буттал ва ниттил цаннацIун ца къабавкьусса, цаннан ца къабувчIусса кIанттурду къашайва. Бутта аьпалул хьусса гьантрай, ванал бивкIулул кьурчIишиву духIан къархьуну, инсульт хьуна ниттий, дачIи шинава цурдагу дунияллия ларгуна, — дакIнийн бичлай бур оьрчIру.
Рашид Мусаевичлул цува кунма яхI-къирият дусса, ххаллилсса оьрчIру тарбия бувну бур. Ванал кIиягу арс АхIмади ва НурмахIаммад виваллил иширттал органнал зузалт бур. Цила чIумал АхIмади комсомолданул лавай­сса даражалул школалийн увхсса чIумал, Рашид Мусаевич хъинну ххарину ивкIун ур арсная. Ва школа буссаксса хIаллай, 40 шинал лажиндарай, му Дагъусттанная увагу 15 инсаннал къуртал бувну бур. ЦIана АхIмади ур Дагъусттаннал Виваллил иширттал управлениялул хъунаманал хъиривчу. НурмахIаммад майорнал чиндалуву пенсиялийн увккун ур. Душ ПатIимат, буттал пиша язи бувгьуну, учитель хьуну бур, зий бур МахIачкъалаллал 40-мур школалий. Вагу бур Дагъусттаннал лайкь хьусса учитель, Аьра­сатнал КIулшивуртту дулаврил хIурматлувсса зузала. Вайнналми оьрчIругу бюхъу-бажар бусса, ду­ккавриву итххявхсса бур. АхIмадил душ, мусил медальданий школагу къуртал бувну, Дагъусттаннал университетрал юридический факультетрай хьхьичIунну дуклай бур. Арс, шяраваллил хозяйствалул академиягу къуртал бувну, Сбербанкрай зий ур. НурмахIаммадлул душнилгу школа къуртал бувну бур мусил медальданий. ЦIана ва дуклай бур Дагъусттаннал медициналул академиялуву. ПатIиматлул душнил ЯтIул дипломрай къуртал бувну бур Дагъусттаннал университетрал тарихрал факультет.
Дуккаву гьар цимурцаннуяр хьхьичIун ласлай ивкIсса Рашид Мусаевичлуя укунсса наслу бизаву махIаттал хьунсса иш бакъар.
ХIакьину Рашид Мусаевичлул оьрчIру буттал аьпа абад баврил къайгъурдай бур. Шяравусса буттал къатрал чIирай ларчIун дур мармарчарил ула. Хъирив буклай бур Рашид Мусаевичлул бачIи оьрму лавг­сса МахIачкъалаллал 3-мур школалун ванал цIа дулун.
— Чув бухьурчагу, бутта кIулсса инсантал хьунабавкьукун, га кьадру-кьиматрай дакIнийн утлан бикIай, ганал хатиричун жул лавай бацIлан бикIай, — тIий, буслай бур оьрчIру.
2011 шинал май зурул 6-нний оьрмулул 74 шинаву дунияллия лавгун ур Рашид Мусаевич. Амма ванал махъ ливчIун бур ххаллилсса наслу, барчаллагьрай цува дакIнийн утлатисса цимирагу никирал выпускниктал.