ЧIивисса миллатрал бюхттулсса арс

Ларгсса нюжмар кьини Гъумук Хъун бярничIа хьунни революционер, шаэр, публицист, Дагъусттаннал цалчинсса драматург, миллатрал мазурдий буклай байбивхьусса цалчинсса кказитрал редактор Гьарун Саэдовлул аьпалул ула тIитIлатIисса шадлугъ.
Му сакин дурну дия Гьарун Саэдовлул цIанийсса жяматийсса фондрал Лакрал райондалул администрациялущал цачIуну. Му цурдагу хьунни Октябрь революциялун 100 шин ва Гьарун Саэдовлул итабакьлай ивкIсса «Илчи» кказитрангу 100 шин там шаврил юбилейрдан хас дурсса мероприятиярттал лагрулий.
Муний гьуртту хьунни: Качар ХIусайнаева, Гьарун Саэдовлул тIивтIусса «Илчи» кказит цIунил буклай байбивхьуния шихунмай хъунмур редакторну зий 26 шин дурсса; Рамиз Саэдов, Гьарун Саэдовлул уссил арснал арс; Давди Увайсов, Гьарун Саэдовлул цIанийсса жяматийсса фондрал хъунама; Ссугъури Увайсов, Дагъусттаннал халкьуннал шаэр; Рукьижат Макьсудова, Дагъусттаннал паччахIлугърал педуниверситетрал Боевой Славылул музейрал директор; — Магьди; Лакрал райондалул каялувчитал; Ваччиял шяраваллил агьулданул вакилтал; Гъумучиял школалул учительтал ва дуклаки оьрчIру.
Райондалул администрациялул бакIчинал цалчинма хъиривчу Абакар Къюннуевлул кIицI лавгуна Гьарун Саэдов хъинну нажагьсса ва ляличIисса бюхъу-гьунарданул инсан ивкIшиву.
— Гьарун Саэдовлун хас бувсса лу ххилтIу буллай, на хъинну махIаттал-хIайран хьуну ливчIунна. Зува хIисав бара, хIакьину зувира шинал оьрмулувусса жагьилталгума нажагьссавагу бакъар нитти-буттал аякьалула бувксса. Га, тIурча, мяйра шинал оьрмулуву цайнува цува лавгун, Щурагь реальный училищалуву дуклай ивкIун ур, чIавасса оьрмулий чялишну революциялул иширттавухгу хIала увххун, сакин бувну бур дагъусттаннал агьали чаннайн буккан бан оьвтIутIисса бюро, итабакьлай айивхьуну ур «Илчи» кказит. Кьура шинал оьрмулуву чивчуну бур драма «Къалайчитал», М. Горькийл «На дне» ва Островскийл «Гроза» тIисса произведениярттащал архIал бацIан бансса даражалул пьеса. ПаччахIнал къуллугъчинал кулпатрава увксса, ссахчIав мюхтаж акъасса жагьил миски-гъаривнал чул бувгьуну, паччахIнайн къарши увккун, жан кьурван дурну дур. КутIасса оьрмулий Гьарун Саэдовлуща бювхъуну бур Дагъусттаннал тарихраву кьаритан чIярусса давуртту ва яргсса цIа, — увкуна ванал.
Аьпалул улттуя пардав дуркьуна Рамиз Саэдовлул ва Давди Увайсовлул.
Давди Увайсовлул бувсуна Гьарун Саэдовлул оьрмулия ва ванал уссурваврая.
— На ттунма хъунмасса талихI хьушиврун ккалли бара Гьарун Саэдовлул «Илчи» кказит ттула кIунттихьхьун ласун кьисмат хьуну, 26 шинал мутталий, ххаллилсса коллективгу бавтIун, миллатрал хьхьичI лажин кIялану жула даву дачин дан бюхъаву, — увкуна Качар ХIусайнаевал — Гьарун Саэдов ттун Аллагь куна чIалан икIайва. Уздансса, каши ххисса кулпатрава увксса оьрчI унува, ми гьарзадгу кьариртун, хIукуматращал, паччахIнащал ччалли увккун, цала мискинсса миллатрал цIаний жан харж дурну дур. Гьарун Саэдовлуя буслай лахъи къабулланна, ванал хьхьичIунсса дус Ибрагьим-халил Кьурбанаьлиевлул «НякI чIутIул чявхъа» тIисса лу ккалай байбиширча, зуща га канища щяв бишин къахьунтIиссар.
Гьарун Саэдовлул «Къалайчитал» чивчуну бур Гъумук кIива гьантлул дянив. Муния буслан икIайва жула хьхьичIунсса тарихчи Муртазали Кьурбиев. Дагъусттаннай цалчинсса драма чивчуну бур драматургиялул яла бюхттулми тIалавшиннардил даражалий.
Качар ХIусайнаевал дуклаки оьрчIан маслихIат бувна Гьарун Саэдовлул цала творчествагу, личIи-личIисса аьлимтурал ваная чирчусса макьаларттугу дуккин, дунияллул хьхьичIунсса миллатирттащал архIал бацIан бан бюхъайсса бушиву лакрал чIивисса миллат так ца Гьарун Саэдовлул эбратрайнугума исват хъанахъиссар тIий.
Ихтилатру ялагу бувна Ссугъури Увайсовлул ва Рукьижат Макьсудовал. Гъумучиял школалул дуклаки оьрчIал дурккуна Гьарун Саэдовлул назмурду.
Давди Увайсовлул Гъумучиял библиотекалун пишкаш бувна Гьарун Саэдовлуясса лу.

Зулайхат Тахакьаева