Ххувшаврил байрандалул хьунийн Гъумук хьунни 1-мур ранграл капитан, политик ва журналист, Абхазнал республикалул яла лараймур наградалун ккаллисса «Леоннул ордендалун» лайкь хьусса Аьлиев Аьли Минкаиллул арснал аьпа абад буллалисса митинг. Ва ялапар хъанай ивкIсса къатрал чIирайн аьпалул улагу лачIун дурну, кIичIирангу цIа дирзунни.
Ва ишираву гьуртту хьунни райондалул каялувчитал, ДР-лул культуралул министр Зарема Буттаева, ДР-лул Халкьуннал Мажлисрал депутат ЖахIпар Абуев, Аьли Аьлиевлул гъан-маччами.
Райондалул бакIчи Юсуп МахIаммадовлул кIицI лавгунни Аьли Аьлиев ивкIшиву Дагъусттанналгу, Аьрасатналгу хIакьсса ва бюхттулсса патриот.
«Зувиллий ххюннияр ххишаласса шинну хьуну дур Аьли Минкаиловичлул жамирдай ва СССР-данул аьрали хьхьирил флотрал частирдай къуллугъ буллай. Къуллугърая лавгун ур 1-мур ранграл капитаннал цIанищал. Агьалинан Аьли Минкаилович кIулссар Абхазнал виричу хIисаврай. Абхазнаву дяъви нанисса 1992-1993 шиннардий, цайнува цува лавгун тихун, хьхьирил флотрай каялувшиву дуллай ивкIссар. Миллатирттал суккушиннарду сакин дуллай байбивхьусса ппурттуву чялишсса гьурттушинна дуллай ивкIссар МахIаммад Хачилаевлущал «Гъази-Гъумучи» дастталугърал иширттаву», – увкуна ванал.
Дагъусттаннал паччахIлугърал шяраваллил хозяйствалул академиялул преподаватель Аслан Къажлаевлул кIицI лавгуна Аьли Аьлиевлун ххаллилну кIулну бивкIшиву щалагу Ухссавнил Ккавкказнал тарих.
Аьли Аьлиевлул душнил Дианал кIицI лавгуна цала бутта ивкIшиву тIайламур ччисса ва тIайламунихлу талатисса инсан. Мунияту лавгхьунссия Абхазнавунгу, чIивисса миллат къума-цIан буллалаву тIааьн къабизлай буну тIий, — увкуна ванил.
Аьпалул ула тIитIин бувкIцириннахь барчаллагь увкуна Аьлил уссил Шамиллул.

Зулайхат Тахакьаева