Апрель зурул 1-нний дайдирхьуну, щаллусса зуруй ЦIуминалийсса ЦIуссачIурттащиял шяраву най дуссия Дагъусттан Республикалул жяматийсса ва политикийсса ишккакку Сиражуттин Илиясовлул призру ласаврил цIанийсса ттуплий буккаврил кубок. Лакку кIанттул кубокрал цIаний бяст-ччаллий дуклай дия Лакрал, ЦIуссалакрал, Ккуллал, Рутуллал ва Агъуллал районнаясса 37 команда.
Цалчин ва бяст-ччал хьуссар ларгсса шинал Лакрал райондалул азарханалул хъунама хIакин АьвдурахIин Дибировлул каялувшиндаралусса «Гъази-Гъумучи» тIисса ихIсандалул фондрал сипталийну. ЧIирисса чIумул мутталий турнирдалул сий хъинну гьаз хьунни. Тамашачитуравух чансса бакъая, цала шяраваллал командартту дакъа тIий, пашманссагу.
Зуруй най диркIсса турнирданий гьуртту хьусса царагу команда хьхьарасса дакъая.
Ягинсса бяст-ччалливу ахиргу финалданувун дурккунни Хъусращиял, Къяннал, Щардал ва Гьамиящиял командартту. Вайннавагу кубокрал цIаний бястлий дурккунни Къяннал ва Хъусращиял командартту. Къяннал командалуву уклай ия Олимпий чемпион Ширвани Мурадовгу. Ва бия унгу-унгусса ттуплий буккаврил бяст-ччал. КIирагу команда цаннияр ца гужну дуклай, ттуп бакьин къахъанай мадарасса хIал хьуна. Тамашачиталгу кIибивщуну, цалла-цалла командарттахлу буклай, гьавасланну ялугьлай бия.
Ахиргу Къяннал командалуща ттуп бакьин бювхъунни, ваннал лайкь бунни турнирданул кубок. Ва эмаратсса, Дагъусттаннал усттартурал бувсса кубок Европанал кубокирттаяр ссалчIав ялавайсса бакъая.
Шадлугърал даражалий ххув хьусса Къяннал командалун кубок ва арцуйнусса бахшишгу дуллуну, кIирагу командалул цачIу, турнирданул сакиншинначитуращал ва бусравсса хъамаллуращал, суратру рирщуна.
Хъирив «Лакку кIанттул кубок – 2017» шадлугърал даражалий ларкьунни. Шикку турнирданул агьамшиврия, мунил мурадирттая бусласисса ихтилатру бунни АьвдурахIин Дибировлул, Лакрал райондалул бакIчи Юсуп МахIаммадовлул, Сиражуттин Илиясовлул, ДР-лул Жяматийсса палаталул хъунаманал хъиривчу Ссапарбаг Аьбдуллаевлул, ДР-лул Халкьуннал Мажлисрал депутатътал Амирхан Амирхановлул ва ЖахIпар Абуевлул.
— Жагьилтурайн цIуллу-цIакьсса оьрмулийн оьвчаву бакъассагу, турнирданул цачIун буллай бур, кувннащал кув кIул буллай, дустал буллай бур щархъаву ва шагьрурдай ялапар хъанахъисса лакрал оьрчIру. Турнирданул ялу-ялун чIявусса тамашачитал лагма лаган буллай бур, — тIий ур «Гъази-Гъумучи» фондрал исполнительный директор Аьбдулла Аьлиев.
Турнирданул хъунама судъя Мурад Бидирхановлул кIицI лавгунни командарттан циняв ттуплий буккаврил техника лархьхьуну душиву, ми цала хIарачатрайну хьхьичIун ливчушиву.
Турнирданий баян бувну бия личIи-личIисса номинацияртту: «яла хьхьичIунма вратарь», «ттуп байгьлагьима», «яла ххуйма игрок», «тамашачитуран ххуй дирзмур команда» ва мукунма цаймигу. Вай номинациярттаву ххув хьуминнангу буллунни дипломру.
Укуннасса турнир «Гъази-Гъумучи» фондрал дан тIий дур Москавлив ялапар хъанахъисса лакрал жагьилтурал дянив. Му дайдишинтIиссар Тушиналийсса «Луч» тIисса стадиондалий май зурул 6-нний. Лакку кIанттул кубокрахлу Москавлийсса турнирданий бястлий дуккантIиссар 15 команда, миннавух – Дагъусттаннай ххув хьусса Къяннал командагу.
А. Аьбдуллаева
И. Саидова
