Апрельданул 26-нний Каспийскалий Кадетътурал хьхьирил школа-интернатрай дия ляличIиссара уттарашинна – ва кьини шикку тIитIлай бия Ухссавнил Ккавкказуллал Федерал округрал кадетътурал идарарттал регионнал дянивсса цалчинсса аьрали ва патриот зумунусса слет. Му хас дурну дия Хъунмасса Буттал кIанттул цIанийсса Ххувшаву ларсун 72 шин шаврин.

Слетравух гьуртту хьун бувкIун бия Ингушетиянал, Къабардин-Балкьарнал, Къалмукьнал, Дарбантуллал ва Дагъусттаннал цалчинмур кадетътурал корпусру.
Слет тIитIлатIисса шадлугъравух гьуртту хьунни республикалул министерстварттал ва ведомстварттал, Каспийскаллал шагьрулул администрациялул, республикалул жяматийсса организацияр­ттал вакилтал.
Ва журалул, ва даражалул слет жулла республикалий цалчинни дуллалисса. Мунияту ванийн бувкIсса хъамалгу бия чIявусса.
Шадлугъ дайдирхьуна Аьрасатнал ва Дагъусттаннал гимнрдая.
Республикалул каялувшиндарал цIания махъ лавхъунни ДР-лул БакIчинал ва ХIукуматрал Администрациялул Коррупциялул ххуллу кьукьаврил управлениялул начальникнал хъиривчу Аьлибек Аьлиев­лул. Каспийскаллал администрациялул бакIчинал цIания слет тIитIаврищал барча буллалисса махъ лавхъунни мунал цалчинма хъиривчу НухI АхIмадовлул. Махъру ялагу лавхъуна генерал, Рес­публикалул ТОКС-рал каялувчи ­Оьмар Муртузалиевлул, ДР-лул жагьилтурал иширттал министр Арсен ХIажиевлул, ДР-лул БакIчиначIасса ОьрчIал ихтиярдал вакил Мария Ежовал.
Къалмукьнал Республикалул БакIчинал маслихIатчи, Къалмукьнал казачий округрал атаман Эрдни Манжиковлул барчаллагь увкунни ва ххаллилсса даврил сиптачитурахь ва сакиншинначитурахь, дурккунни Къалмукьнал БакIчи Алексей Орловлул чулухасса барча бавугу.
Кадетътурал слет лахъи ларгунни шанма гьантлийсса. Му чIумул дянив кадетътуран хасну хIадур дурну дия хъуннасса ва авадансса программа. Мунил лагрулий кадетътал бивунни «Москва» КРЦ-данувун, экскурсиялий лавгунни Дарбантлив ва МахIачкъалаллал аьрали портрайн.
Слетравух гьуртту хъанахъиминнал дянив хьунни тIуркIу – «Кадетътурал уссушиву», мунил лагрулий кIира этапIрай оьрчIал дянив хьунни личIи-личIисса конкурсру. Миннул хIасиллайн бувну, ххув хьунни Каспийскаллал КМШИ, кIилчинсса кIанттайн бувккунни Дарбантуллал кадетътурал корпус ва шамилчинсса кIанттайн – Къабардин-Балкьарнал Республикалул 2-мур Кадетътурал школа-интернат. Ххув хьуминнан буллунни кубокру ва дипломру, гьуртту хьусса цинявннанмагу – дипломру.

Бадрижамал Аьлиева