Жула билаятрай майрал 9-нний ца яла агьаммур байран кIицI лагай. Му кьини жува дакIнийн бичару Хъун дяъвилий гьуртту хьусса жула гъан-мачча, шяравачутал ва вайми щархъавасса чиваркI.
Миннавасса ца хъанай ур ГьунчIукьатIрал шяравасса, жула цIа ларгсса «атомщик» Амаев Амир Жабраиллул арс.
Дяъвилул шиннардий Ухссавнил Ккавкказ душманная мурахас буллалисса талатавриву гужсса щаву дирну, мушакъат хьусса Амир тIайла увкссар шавайн. Дяъви къуртал хьуну махъ дуклан увхссар Москавуллал инженер-физикалул институтравун (МИФИ). Му къуртал бувну махъ тIайла увккун ур Атомрал энергиялул институтравун. Микку зий Амирдул хьуссар 61 шин. Зийгу ивкIссар машгьурсса академиктал И.В Курчатовлул, А.П. Александровлул каялувшиврулу.
Совет Союзрал цалчинсса, щинал лултту дачайсса атом лодкарду дурссар Амир Амаев гьурттусса пишакартурал. 1963 шинал ванан дуллуссар Лениннул премиялул лауреатнал цIа. Оьрмулул 90 шинавугу Амир зий ивкIссар институтраву паччахIлугърал ядерный энергетикалул хьхьичI бивхьусса масъалартту щаллу буллай. Сайки 20 шинай МАГАТЭ-лувусса Совет Союзрал чулухасса пишакартурал бакIчишиву дуллай ивкIссар ва мукуна Совет Союзрал ва Американал цачIусса ядерный мюхчаншиврул комиссиялул председательнал чутнугу ивкIссар.
Техникалул элмурдал доктор, профессор Амир Амаев Лениннул премиялул лауреат акъасса, СССР-данул Министртурал Советрал, Атомный энергиялул министерствалул, И.В. Курчатовлул цIанийсса премиярттал лауреатгу хъанахъиссар. Мукуна хъанахъиссар Дагъусттан Республикалул элмулул лайкь хьусса ишккакку.
Жу, Москавлив ялапар хъанахъисса дагъусттанлувтал, гьар шинах майрал 9-нний, аьпалул махъгу учин, тIутIивгу дишин, дагьайсса цаймигу аьдатру дан батIайссару жула цIанихсса вирттал АхIмад-Хан Султан ва Наби Аминтаев бувччусса Новодевичий хIатталлив. Гьашинуния тихунмай жу вара майрал 9-нний биявантIиссару Хъун дяъвилул ветерантал-дагъусттанлувтал, миннавух аьпа биву профессор Амир Амаевгу, увччусса Троекуровский хIатталливгу.
Дагъусттаннал халкьуннал шаэр Расул ХIамзатовлун ва Амир Амаевлун Лениннул премия дуллуссар цара ца шинал – 1963 шинал.
МахIачкъалалив шаэрнал аьпалун дирхьусса гьайкаллу дур, школардан ва библиотекардан цIарду дирзун дур. Му тIагу-тIайлассар. Жун бувчIлай бур МахIачкъалалив Амир Амаевлул цIа дизансса хъуни кучарду чIявусса бакъашиву. Амма профессорнал цIа дизансса (шагьрулул зума-къирагърайсса кучалул ца парча бакъача), цахъи шагьрулул дянивсса, лайкьсса куча ккаккан баву тавакъюри. Билаятрал ядерный энергетикалул аралуву Амир Амаевлул бивхьусса захIмат лап хъунмассар. Дагъусттаннал ва МахIачкъалаллал бакIчитал ванал аьпа абад бавриву гьуртту хьун буржлувссар. Му жуйвассагу буржри.
«Дагъусттан» Москавуллал культуралул центрданул хъунама Арсен ХIусайнов ва центрданул президиумрал вакил Даниял Шяъбанов
