Лакку шеърирдал байран

Ххуллун кьини А. Къапиевлул цIанийсса Лакрал музыкалул ва драмалул театрдануву дия тачIав дакъачIинсса уттарашинна. Театрданул каялувчи Бадрижат МахIаммадхIажиевал сипталийну гьашину кIилчин хьунни лакку мазрай пасихIну дакIних шеърирду буккаврил конкурс – «Щаращи».
Муний гьуртту хьун бувкIун бия лакрал шаннагу райондалиясса ва МахIачкъала, Каспийск, Буйнакск шагьрурдаясса дуклаки оьрчIру – 70-ннийн бивсса. Вайннан кьимат бишлай бия цалла даву лакку мазрацIун дархIусса лавайсса даражалул пишакартал: Качар ХIусайнаева, Гулизар Султанова, Аслан МахIаммадов, Уди Аьлиева, Жинасат ДинмахIаммадова, Светлана Мутаева.
Гьурттушинна дурсса цумацагу оьрчIан буллунни сакиншинначитурал чулухасса дипломру ва луттирду. ХьхьичIунсса кIанттурду бувгьуминнан дия спонсортурал чулухасса багьлул ххирасса бахшишру.
– Миллатирттал мазру ябансса хъунмур хъар, кказит-журналлая, луттирдая ливчуну махъ, театрдайри дусса. Мунийн бувну жула даврил ца агьамсса ххуллуну жу ккаклай буру ялун нанисса никиран ниттил мазрах, ниттил мазрайсса творчествалух ччаву рутансса давуртту. Микку ялун личлай бур гьунар бусса оьрчIругу, – тIий бур Бадрижат МахIаммадхIажиева. – Зунма чIалачIисса куццуй, махъсса шиннардий театрданувун зун букIлай бия лакку маз бувагу къакIулсса жагьилсса актертал. Миннан маз лавхьхьусса театрданувур, завлит Гулизар Султановал, режиссер Аслан МахIаммадовлул, лакку маз цила багьайкун кIулсса бугьарасса актертал Уди Аьлиевал, Ларина Оьмаровал, Жинасат ДинмахIаммадовал хIарачатрацIух, вайннал дихьлахьисса дарсирдайну.
Лакку маз кIулсса жагьилтал хIакьину Лакрал театрданун ккалли хъанахъиссар багьа бакъасса хъуслин. Мунийн бувну «Щаращи» конкурсрал жун кабакьу буллалиссар лакку маз кIулсса, пасихIну шеъри буккин бюхъайсса оьрчIру-душру ялун личин бан. Ххариссару лакрал шаннагу райондалиясса дуклаки оьрчIал конкурсрай чялишсса гьурттушинна даврия. Барчаллагь тIий буру конкурсрайн оьрчIру тIайла буккансса сакиншинна дузал дурсса районнал бакIчитурахь, кIулшиву дулаврил управлениярттал каялувчитурахь, лакку мазрал дарсру дихьлахьисса учительтурахь.
Аслан МахIаммадовлул кIицI лавгуна шагьрурдал школарттаясса оьрчIал хIадуршинна, ларгсса шинах бурувгун, гьашину ларайсса душиву, мазгу биялну итххявххун бушиву.

Конкурсрал хIасиллу хьунни укунсса.
Лавайми классирттал дуклаки оьрчIал дянив:
Цалчинмур кIану бувгьунни Тамазаев Сурхай-ханнал (Гьамиящиял школа, учительница Исяева Анжела); кIилчинмур кIану – Оьмаева Рабиятлул ( Каспийскаллал ГИМХО, учительница Аминова Лариса);
шамилчинмур кIану – Гуйдалаев Арсланнул (МахIачкъалаллал 37-мур школа-гимназия, учительница Парамазова Умамат).

Ялавайми классирттал дуклаки оьрчIал дянив:
Цалчинмур кIану бувгьунни Гаммакуев Аскандардул (Ваччиял школа, учительница ХIусайнова ХIурия); кIилчинмур кIану – Рамазанова Загьидатлул (МахIачкъалаллал 17-мур школа, учитель Амиров ХIажи); шамилчинмур кIану – Маммаева Анжелал (МахIачкъалаллал 30-мур лицей, учительница Чаринова Ума).

Жюрилул чулухасса бахшиширттан лайкь хьунни: Аскандаров Заур (МахIачкъалаллал 50-мур школа, учительница Аскандарова Ума); ХIалимова Асият (Щардал школа, учительница ЦIаххаева Сивана); Амаева Ххадижат (МахIачкъалаллал 30-мур лицей, учительница Чаринова Ума); Бархулаева Мисиду (Ккурккуллал школа, учительница Магьдиева Гульнара); Кьурбанова Шагьидат (ЦIуссалакрал школа, учительница Сайпуллаева СалихIат); Жамилова Алина (Вихьуллал школа, учительница ХIусайнова Аьйша).

Конкурсрал сакиншинначитал дакIнийхтуну барчаллагьрай бур Лакрал театрданул муданмасса чIарахбацIултрайн: Ссапар Аьбдуллаевлуйн, Гъази Гъазиевлуйн, Султан ЦIаххаевлуйн, Шяъван Оьмаровлуйн, Аьбдуллагь Расуловлуйн, Мариян ХIусайновайн, МахIаммад Аьлиевлуйн, Алик Исрапиловлуйн, ХIасан Аьлиевлуйн, Зиябуттин ХIажимирзаевлуйн.

Зулайхат Тахакьаева