«Дагестан» РИА-лул редакциялий журналистуращал хьунабавкьунни ГИББД-лул вакилтал. Вайннал бувсунни, январь зуруя байбивхьуну, март зуруйн бияннин машинарттал ххуллурдай хьусса авариярттал хIасиллая.Журналистурал суалла­хьхьун жавабру дуллай бия УГИББД МВД-лул хъунама Евгений Нечаев, ДПС-рал отделлал хъуниминнал хъиривчутал Руслан ХIажимахIаммадов ва Атай Алхлавов.
И. Саидова
Евгений Нечаевлул бувсунни, ларгсса шинах бурувгун, гьашину республикалул ххуллурдай аварияртту чанну хьуну душиву.
— Ларгсса шинал январь, февраль, март зурдардий республикалул ххуллурдай хьуну дур 310 ДТП, миннуву ливтIуну ур 80 инсан ва 457 инсаннан личIи-личIисса апатIру хьуну бур. Вава мутталий гьашину хьуну дур 295 ДТП, ливтIуну ур 59 инсан ва 451-ннан хьуну дур цIунцIияртту. Цуксса ялув бацIларчангу, ДТП-ртту хъанайнна дур, оьрмурдацIа хъанай бур ва цIунцIияртту диллай дур инсантурайн, — увкуна ванал.
Евгений Нечаевлул бусаврийн бувну, ххуллурдай чIяруми ДТП-ртту гьарза шаврил савав хъанай дур машинартту къадагъа дирхьусса хьхьичIсса полосалийн буккан буллалаву. Руслан ХIажимахIаммадовлул цала ихтилатраву чIурчIав дунни ДТП-ртту машинартту цил багьайкун бавкьуну бакъашиврийнугу тикрал хъанай душиву.
— Цивппа заллусса идарар­ттай дурсса техосмотрду дур ялттура дурсса. Масалдаран, Москавуллал областьрай техосмотр дуршиврий ккаккан дурну дур МахIачкъалаллал школа-интернатрал оьрчIру буцайсса 5 автобусрай, хIатта вай автобусру тийн бивну бакъа бунагу. Вай укунсса иширттал хIакъираву, материаллу дартIун, Аьрасатнал Страховщиктурал союзрайн тIайла дуккай­ссар, къалпсса техосмотр душиву тасттикь буллалисса хIукму кьамул баву тIалав буллай. Республикалий хIакьинусса кьини укунсса техосмотрду дуллай бивкIсса шанмайва ишбажаранчитурал даву дацIан дур­ссар. ДТП-ртту машинартту бавкьуну бакъашиврийну хьуну душиву тасттикь байхту, миннул хIакъиравусса материаллу гьан дайссар кIантту-кIанттурдайсса ГАИ-лийн ва миннал кIул бай­ссар машинарттал техосмотр дурсса идарартту, — увкуна Руслан ХIажимахIаммадовлул.
УГИББД-лул хъунама Евгений Нечаевлул кIицI лавгунни ххуллурдай оьрчIру хIаласса ДТП-ртту гьарза хъанай душивугу.
Ларгсса шиналсса шанма зурул мутталий хьусса 25 ДТП-лий ивкIуну ур ца оьрчI, гьашину хьусса 27 ДТП-лий 5 оьрчI ивкIуну ур.
— Вай укунсса иширттая оьрчIру мюхчан баву мурадрай, нитти-буттал аьркинссар миннан ххуллул низам дуру­ччин лахьхьин буллан, мюрщи­сса оьрчIру бувцуну нанисса машинарттавугу оьрчIансса хасъсса креслорду бишин, — увкуна ванал.
Гьашину ххуллурдай ДТП-ртту чанну шаврил сававну дур шофертурал ихтиярдаву дур­сса дахханашивурттугу. Масалдаран, теориялул экзамен дуллалийни кIийла аьйкьирчангу, шофертурахьхьун удостоверенияртту дулайссия. Уттисса кьануннайн бувну, экзамен дуллалийни цал аьйкьирчан, муна­хьхьун булайссар 5 суал цаймигу, миннувугу цукунчIав аьйкьин къабучIиссар.
Экзаменну дуллалисса машинарттайгу, лулттурасса къадулланшиврул, бивхьуну буссар камерартту.
Му бакъассагу, Нечаевлул бувсунни шагьрулул ва федерал ххуллурдал тагьарданиягу. КIицI лавгунни гьануцIакул бакьин буллай бушиву шагьрулийсса тамансса ххуллурду ва чIал къавхьуну байбишин най бушиву гьарта-гьарза буллай МахIачкъалалия Манасрайн бияннинсса ххуллугу.