Дагъусттан Республикалул Халкьуннал Мажлисрал сипталийну, майрал 21-нний дуллалиссар «Республикалул волейболданул кьини» тIисса фестиваль. Волейболданул бяст-ччаллу хьунтIиссар хъунмурчIин МахIачкъалалив ва республикалул оьрчIал спортшколардал майданнай.
ЦIа дурксса волейболчи, тренер Гъазияв АсхIабовлул бусаврийн бувну, волейболданул турнирду хьунтIиссар ДР-лул ведомстварттал командарттал дянив, волейболданул ветерантурал ва жагьилтурал командарттал дянив. Турнирду хьунтIиссар Дагъусттаннал шагьрурдайгу, районнайгу. МахIачкъалалив волейболданул фестиваль ва турнир дуллалиссар Маркаровлул цIанийсса спортшколалул майданнив, Имам Шамиллул кIичIиравусса паркирал чIарав.
Фестиваль даврил хъунмур мурад хъанахъиссар республикалий волейболданул тIуркIу машгьур баву.
Волейболданул кьинилул хIакъираву жу гьарта-гьарзану чичинну хъиривмур номерданий.
ХI. Аьдилов
