Аьрасатнал футболданул Премьер-лигалул 29-мур турданул тIуркIулуву МахIачкъалаллал команда «Анжи» дух хьунни «Ростовраяр».

«Анжи-Арена» стадиондалий хьусса бяст-ччал къуртал хьунни 2:1 счетрайну. Голлу бавкьунни тIуркIулул кIилчинмур бутIуй. «Ростоврал» голлу бавкьунни 3 минутIрал манзилданий. 61-мур минутIрай «Ростоврал» футболчи Сердар Азмуннул цалла команда хьхьичIун дуккан дунни, 64-мур минутIрай муттаэтурал командалувасса Дмитрий Полозлул ххи бунни ялагу ца гол.
МахIачкъалаллал командалуща бювхъунни 78-мур минутIрай бувагу ца гол бакьин муттаэтурал къапулувун, гол бакьин хIарачат бувма ия Александр Прудников. Ва ххуллухгу дух хьурчагу, жулла команда личIлачIиссар Премьер-лигалуву.
Гьашинусса чемпионатрал «Анжилул»» ахир тIуркIу хьунтIиссар майрал 21-нний Москавлив ЦСКА-лущал, ва команда дур чемпионатрал таблицалул 2-мур ххуттай.

ХI. Аьдилов