Дахьва уттигъанну тIивтIусса кунма чIалайнугу, диялсса чIун ларгунни жулла республикалий гьунар бусса оьрчIансса, Мурад Къажлаевлул цIанийсса школа тIивтIуну. Вай гьантрай хьунни му школалул цалчинсса выпускниктуран дипломру буллалисса шадлугъ.

Мунивух гьуртту хьунни ДР-лул культуралул министр Зарема Буттаева, Аьшттарханнал паччахIлугърал консерваториялул профессор Людмила Круглова ва цаймигу бусравсса хъамал.
Ва кьини СССР-данул халкьуннал артист, школалул каялувчи Мурад Къажлаевлул каруннища дипломру лавсунни 11 оьрчIал.
Мурад МахIаммадовичлул умуд бивхьунни вания гихунмайми выпускникталгу цалчинми кунмасса бикIантIишиврийн.
Зарема Буттаевал барча бунни школа, ванил бакI дургьуми ва ххаллилсса иширащал, барчаллагь увкунни Мурад МахIаммадовичлухь ва ванал кулпат Валида Исламовнахь дурсса даврихлу, цачIусса хIарачатрайну укун цIакьсса творчествалул хъунмасса кулпат буван бюхъаврихлу, чIа увкунни оьрчIан гихуннайсса дуккавриву тIайлабацIу.
Людмила Кругловал цилвамур ихтилатраву кIицI лавгунни вай шиннардил дянив Мурад Къажлаевлул ва школалий бувсса захIмат, хIарачат, барчаллагь увкунни школалул коллективрахь укун гьунар бусса оьрчIру тарбия баврихлу.
Ахирданий ва школалий дуклакиминнал ккаккан дунни концерт. Муний хъунмурчIин щаллугу бунни М. Къажлаевлул произведенияртту.

Бадрижамал Аьлиевал