ДР-лул Жагьилтурал иширттаха зузисса министерствалул, Къумтуркъалаллал райондалул культуралул ва жагьилтурал политикалул управлениялул вакилтал хьунабавкьунни 7-мур тарбия баврил колониялийсса дуснакьлувтуращал.
Миннащалсса ихтилатраву министерствалул консультант Юсуп ХIусайновлул бувсунни, жагьилтурал дянив экстремизмалул ва терроризмалул идеология ппив хьун къаритаву мурадрай, министерствалул дуллалисса давурттая. Къумтуркъалаллал райондалул Культуралул ва жагьилтурал политикалул управлениялул хъунаманал хъиривчу Акай ХIусмановлул кIицI лавгунни жагьилминнайн ххишалану бияйшиву укунсса иширттал щавщи, ми цаманал биялдарайн бигьану лагайшиву, мунияту жагьилтурал организациярдал агьаммур мурадгу хъанахъишиву жагьилтал лагма лаган баву, миннащал хIала-гьурттуну бикIаву.
Дуснакьлувтурахь цайми-цаймигу мюнпатсса ихтилатру бунни, хъамаллурал маслихIат бунни миннан цивппа щябивкIсса идаралул дуллалисса давурттавух гьурттушинна дуллай, кIулшивуртту ласун, пиша лахьхьин хIарачат бан, мукунма, цащава итххявхсса гъалатIирттал ялув пикригу бувну, тIайласса ххуллийн буккан.
Акай ХIусмановлул барчаллагь увкунни УФСИН-лул каялувчитурахь ва колониялул хъуниминнахь, укунсса хьунабакьавуртту дуллай тIий. Хъамаллурал махъ буллунни колониялий щябивкIминнан ккаккан дан концерт хIадур дан, мукунма «Сари-хум» тIисса райондалул футболданул командалул ва 7-мур тарбия баврил колониялул цачIун дур командалул дянив футболданул бяст-ччал бан.
