Макьсудлул арс ХIусманов МахIаммад
Оьрмулул 84 шинаву жуятува батIул хьунни цала агьлу-авладралгу, жяматралгу, лакралгу дянив хIурмат ххисса инсан, хьхьичIунсса педагог, патриот, Макьсудлул арс ХIусманов МахIаммад.
МахIаммад увну ур 1932-кусса шинал Ккуллал райондалийсса Хъусрал-ЧIарттал шяраву. 1944-ку шинал зунттавату арандалийн дизан дурсса цала буттал шяраваллил агьулданувух ивзун ур ЦIуссалаккуйн. Школа къуртал бувну, 1952 шинал лавгун ур армиялийн. Тичча кIура авну мукьах зий ивкIун ур Каспийскалийсса оьрчIал тарбиялул колониялий тарбиячину. 1956-1961-ку шиннардий бувккуну бур Дагъусттаннал университетрал тарихрал ва литературалул факультет. Му къуртал бувну махъ чIярусса шиннардий зий ивкIун ур цал учительну, яла Каспийскаллал школарттал директорну. Ванал каялувшиву дуллалисса 8-мур школалул гьанулий сакин бувну бивкIун бур республикалул лагрулийсса методикалул центр. Ванал хIарачатрайхчин мува школалий тIивтIуну бур Совет Союзрал кIийла Виричу АхIмад-Хан Султаннул музей, та цуппа школалунгу дирзун дур АхIмад-Ханнал цIа.
1968-ку шинал МахIаммад ивтун ур Каспийскаллал шагьрулул ОНО-рал отделданул хъунаману. Махъсса ацIрахъул шиннардий МахIаммад ХIусманов зий ивкIссар МахIачкъалаллал 13-мур школалул учительну ва завучну.
Ванал хIалал дурссар «ДР-лул Халкьуннал просвещениялул отличник» ва «ДР-лул лайкь хьусса учитель» тIисса лахъа-хъунсса цIардугу.
МахIаммад мудангу чялишну гьуртту шайссия цала миллатрайн багьайсса гьарцагу иширттавух, хьхьичIунсса дусъя, чIарахацIуя лакку мазрай буккайсса кказит-журналлал, литературалул.
МахIаммад аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал кулпат Шуаьнатлухь, душру Мадинахь ва Маринахь, уссу Хизрихь ва махъсса цинявппагу гъан-маччаминнахь. МахIаммадлул бунагьирттал аьпа баннав, рухI рахIатний дишиннав.
Хъусрал-ЧIарттал, Гъумучиял жяматру, дустал, гьалмахтал
АхIмадлул душ Аьлиева Фая
Февраль зурул ахирданий оьрмулул 83 шинаву, цаппара хIаллай къашавайгу хьуну, дунияллия лавгунни гьарцагу чулуха бавкьусса зунттал хъамитайпа Аьлиева Фая АхIмадлул душ.
Фая бувну бур 1934 шинал ГьунчIукьатIрал шяраву усттарнал кулпатраву. Ялапар хъанай бивкIун бур Дянивмур Азиянаву Номанганнай. Школагу къуртал бувну, МахIачкъалалив бувкIун, шийх университетравун бувххун бур. ЦIуцIаву савав хьуну, дуккаву къуртал дурну дакъар. Щаргу хьуну, кIа цуппа дуклакисса университетраву бухгалтерну зий бивкIун бур пенсиялийн букканнин.
Фая бия захIмат ххирасса, цилла даву лажин кIялану щаллу дувайсса зузала. Цила бувсса захIматрахлу лайкь хьуну бия мадарасса бахшиширттан. Цила ласнащал МахIаммадлущал, хъунигу бувну, дуккин бувунни душру, цивппа кунма, ас-намус ххисса. Ванил цила оьрму лажин кIялану, марцIну, бусрав буну бувтунни.
Фаял бивкIулул кьурчIишиву кIидачIлай, жижара буллай буру ванил душваврахь, уссихь, ссихь, цинявппагу гъан-маччанахь. Цил бунагьирттал аьпа баннав, рухI хъинний дишиннав. Алжан нясив баннав. Ванин бакъамур оьрчIан, уссурссуннан булуннав.
ГьунчIукьатIрал
ва КIямашрал жяматру
«Илчи» кказитрал муданасса дус, уртакь,
Макьсудлул арс ХIусманов МахIаммад
аьпалухьхьун лагаврийн бувну, дакIнийхтунусса жижара буллай буру мунал кулпатрахь, уссурссуннахь, цинявппагу гъан-маччаминнахь. Цув алжаннул ххари аннав.
«Илчи» кказитрал коллектив
